बिवाइडी अटोको नेपालका लागि आधिकारिक वितरक साइमेक्स इंक प्रालिले काठमाडौंको कालीमाटीस्थित दुई पकेट फरेस्टमा पाँच सय ५० वृक्षारोपण गरेको छ । कम्पनीले ‘बिल्डिङ ड्रिम्स एन्ड फरेस्ट’अन्तर्गत द हिडन ट्रेजर, रिभोलुसन प्रोजेक्ट र काठमाडौं महानगरपालि–१३ सँगको सहकार्यमा सो वृक्षारोपण अभियान सम्पन्न गरेको हो ।
सो कार्यक्रममा मिस नेपाल २०२४ का प्रतियोगीले समेत सहभागिता जनाएका थिए । यसले वातावरणीय परिवर्तनका लागि सामुदायिक साझेदारीको शक्तिलाई संकेत गरेको कम्पनीको भनाइ छ । नयाँ पकेट फरेस्टमा रोपिएका बिरुवाको वृद्धि र दिगोपनाका लागि कम्पनीले तीन वर्षसम्म हेरचाह र सम्भार गरिनेछ । प्रदूषणले आक्रान्त बनेको काठमाडौं उपत्यकामा हरित र स्वस्थकर सहरी वातावरण निर्माण गर्नमा साइमेक्सको प्रतिबद्धतालाई यसले जोड दिन्छ ।
यसबाट पाँच वर्षपछि दुई सय ९५ टन अक्सिजन उत्पादन हुुनेछ भने एक सय ११ टन कार्बन स्टोर हुनेछ । त्यसैगरी, १० वर्षपछि पाँच सय ९१ टन अक्सिजन उत्पादन हुने र दुई सय २२ टन कार्बन स्टोर हुनेछ भने २० वर्षपछि एक हजार एक सय ८२ टन अक्सिजन उत्पादन हुने र चार सय ४३ टन कार्बन स्टोर हुने कम्पनीले जनाएको छ । ‘बिल्डिङ ड्रिम्स एन्ड फरेस्ट अभियानअन्तर्गत कालीमाटीमा पाँच सय ५० वृक्षारोपण गरेका छौँ,’ साइमेक्स इंकका चिफ मार्केटिङ अफिसर समीर श्रेष्ठले भने, ‘यो पहल वातावरणीय दिगोपना र सामुदायिक संलग्नतामा हाम्रो समर्पणको प्रमाण हो ।’
‘बिल्डिङ ड्रिम्स एन्ड फरेस्ट’ अभियानले विशेषतः सहरी क्षेत्रमा हरियाली निर्माण गर्न र वातावरणीय दिगोपनाका लागि योगदान गर्ने लक्ष्य लिएको छ ।
