2022-09-29-12-22-58.jpeg)
हेटौँडामा बागमती प्रदेशका नवनियुक्त मुख्यमन्त्री बहादुरसिंह लामाले पहिलो चरणमा १० सदस्यीय मन्त्रिपरिषद् बनाएका छन् । मंगलबार मुख्यमन्त्री नियुक्त भएका लामाले बुधबार कांग्रेसबाट तीन र सत्तासाझेदार एमालेका ६ गरी नौजना मन्त्री पनि नियुक्त गरेका हुन् ।
एमालेबाट नियुक्त भएका मन्त्रीहरूले जिम्मेवारी पाए पनि कांग्रेसका मन्त्रीहरू विनाविभागीय छन् । नवनियुक्त मुख्यमन्त्री र मन्त्रीहरूले बुधबार शपथग्रहण गरी कार्यभार सम्हालेका छन् ।
१३ सदस्यीय मन्त्रिपरिषद्लाई बुधबारै पूर्णता दिने भनिए पनि कांग्रेसले मन्त्रीको टुंगो लगाउन नसकेको हो । कांग्रेसबाट थप तीनजना मन्त्री नियुक्त हुन बाँकी छन् । मन्त्रीका आकांक्षी धेरै भएकाले टुंगो लगाउन नसकिएको कांग्रेस संसदीय दलका प्रमुख सचेतक गोविन्दप्रसाद लम्सालले बताए ।
बुधबार एमालेबाट नियुक्त भएका मन्त्रीहरूले जिम्मेवारी सम्हालेका छन् । कृषि तथा पशुपन्छीमन्त्रीमा प्रकाश श्रेष्ठ, स्वास्थ्यमन्त्रीमा किरण थापा, वन तथा वातावरणमन्त्रीमा कृष्णप्रसाद सिलवाल, उद्योग, वाणिज्य, भूमि तथा प्रशासनमन्त्रीमा सुकमाया तामाङ, भौतिक पूर्वाधार विकासमन्त्रीमा अमन मास्के र श्रम, रोजगार तथा यातायातमन्त्रीमा प्रेमभक्त महर्जनले शपथ लिएका छन् ।
कांग्रेसबाट कुन्दन काफ्ले, श्यामबहादुर खड्का र मदुकुमार श्रेष्ठ मन्त्री बने पनि जिम्मेवारी तोकिएको छैन । मुख्यमन्त्री लामाले शीर्ष नेताहरूसँग छलफल गरी चाँडै मन्त्रिपरिषद्लाई पूर्णता दिने र हाल जिम्मेवारीविहीन रहेकालाई जिम्मेवारी दिइने बताए ।
उनले जनतालले सुशासनको प्रत्याभूति गर्ने गरी सरकारले काम गर्ने बताए । ‘विकास र सेवा प्रवाहमा प्रदेश सरकार संवेदनशील भएर काम गर्छ । सुशासन र वित्तीय अनुशासन प्रदेश सरकारको पहिलो सर्त हो । हाम्रो कामले नागरिकले दुःखी हुनुपर्दैन,’ उनले भने, ‘दुई ठूला दल मिलेर बनेको सरकारले नागरिकलाई निराशा होइन आशा दिन्छ ।’
