कञ्चनपुरको पश्चिम नाका गड्डाचौकीस्थित सीमावर्ती सडक कालोपत्रे गरिएको छ । भीमदत्त नगरपालिका– ११ गड्डाचौकीमा सीमावर्ती सडक कालोपत्रे गरिएको हो । ७ नम्बर सीमा पिल्लरदेखि पूर्वतिर नेपालतर्फ कालोपत्रे सडक निर्माण गरिएको भीमदत्त नगरपालिका– ११ का वडाध्यक्ष प्रकाश थापाले बताए । वडाध्यक्ष थापाले भीनपा– ११ कै मागअनुरूप सुदूरपश्चिम प्रदेश सरकारले सडक निर्माणका लागि बजेट दिएको बताए ।
भारतीय पक्षले पश्चिमदेखि पूर्वतिर ७ नम्बर सीमा पिल्लरसम्मै यसअघि कालोपत्रे गरिसकेको थियो । उनले भने, ‘अहिले हामी नेपाल पक्षले पनि सीमा पिल्लरदेखि पूर्व ६ लेन सडकसम्मै कालोपत्रे गरेका छौँ ।’ सीमा पिल्लरदेखि ६ लेन सडकसम्म झन्डै तीन सय मिटर सडक कालोपत्रे गरिएको वडाध्यक्ष थापाले बताए ।
भारतीय पक्षले आफ्नोतर्फ धमाधम सडक निर्माण गर्ने, तर नेपालतर्फ कालोपत्रे मात्रै नभई सामान्य सडक मर्मत गर्दासमेत अवरोध गर्दै आएको थियो । पूर्वाधार विकास कार्यालय कञ्चनपुरमार्फत चालू आर्थिक वर्षमा खगेन्द्र एन्ड सिंह बिल्डर प्रालिले २३ लाखमा उक्त तीन सय मिटर सडक कालोपत्रेको ठेक्का पाएको थियो ।
सडक कालोपत्रे भएसँगै नेपाल–भारत दुवै देशका यात्रुहरूलाई सहज भएको छ । यसअघि नेपालतर्फ कच्ची सडक हुँदा यात्रुले सास्ती खेप्नुपरेको थियो । सडक कालोपत्रेसँगै यात्रुहरूलाई सहज भएको छ ।
