हरेक वर्ष मलको चरम अभाव व्यहोरिरहेका किसानले यो रोपाइँमा पनि रायायनिक मल पाएका छैनन् । असारमा रोपाइँमा व्यस्त हुनुपर्ने किसान रासायनिक मलकै चिन्तामा छन् । रोपाइँ छाडेर मल बिक्री केन्द्रमा धाउनु उनीहरूको बाध्यता हो । ‘जलवायु मैत्री कृषि, धान उत्पादमा वृद्धि’भन्ने नारासहित भोलि (असार १५) गते चितवनमा नेपाल सरकारले २१औँ राष्ट्रिय धान दिवस तथा रोपाइँ महोत्सव मनाउँदै छ ।
कार्यक्रमको प्रमुख अतिथिका रूपमा प्रधानमन्त्री पुष्पकमल दाहाल प्रचण्ड आउँदै छन् । अन्य दलका शीर्ष नेताहरू पनि जहाजमा काठमाडौंदेखि विभिन्न जिल्ला पुगेर धान दिवस मनाउने तयारीमा छन् ।
तर, देशभरिका किसान मलकै चिन्तामा छन् । खेत रोप्दा डिएपी र पोटास मलको आवश्यकता हुन्छ भने रोपेको एक महिनासम्म धान गोड्नुपर्छ । त्यो समयमा युरिया हालिन्छ । तर, चितवनसहितका किसानले मल नपाउँदा विगत सात वर्षदेखि सिजनमा यस्तै सास्ती भोग्न परेको छ।
