फिफा क्लब विश्वकप नखेल्ने रियलको चेतावनी

प्रतिखेलबाट आउने रोयल्टी फिफाले शतप्रतिशत दिन अस्वीकार गरेपछि स्पेनिस क्लब रियल म्याड्रिडले क्लब विश्वकप फुटबलमा भाग लिन नसक्ने प्रशिक्षक एन्सेलोटीको भनाइ

बुधबार, ३० जेठ, २०८१
डिजिटल संस्करण

अर्को वर्ष अमेरिकाले फिफा क्लब विश्वकप फुटबल प्रतियोगिता आयोजना गर्दै छ । फिफाले पहिलोपटक क्लब विश्वकपमा सर्वाधिक ३२ टोलीलाई सहभागी गराउँदै छ । जसमा युरोपका १२ टोली हुनेछन् । सबै महादेशका च्याम्पियन र उत्कृष्ट क्लबबीच हुने प्रतिस्पर्धामा युरोपबाट युरोपियन च्याम्पियन लिग विजेता रियल म्याड्रिडलाई मुख्य दाबेदार मानिएको छ । 
रियलले अमेरिकामा आयोजना हुने प्रतियोगितामा सहभागिता नजनाउने चेतावनी दिएको छ ।

दुई साताअघि कीर्तिमानी रूपमा १५औँपटक च्याम्पियन्स लिग उपाधि दिलाएका रियलका प्रशिक्षक कार्लोस एन्सेलोटीले क्लब विश्वकपमा भाग नलिने धम्की दिएका छन् । अमेरिकामा प्रतियोगिता चल्दा एक खेलबाट आउने क्लबलाई फिफाले नदिने जनाएको छ । यसअघि फिफाले एक खेलमा प्राप्त हुने रोयल्टीलगायत अन्य रकम सहभागी क्लबलाई दिँदै आएको थियो । 

तर, यसपटक फिफाले शतप्रतिशत रकम नदिने जनाएको छ । यसकारण नै उपाधि दाबेदार रियलले अमेरिकामा सन् २०२५ को जुन–जुलाईमा हुने फिफा क्लब प्रतियोगितामा भाग नलिने प्रशिक्षक एन्सेलोटीले जनाए । ‘सबैलाई थाहा छ, एक खेलको रकम कति हुन्छ । तर, क्लबले पाउनुपर्ने रकम फिफाले दिन आनाकानी गरेको छ,’ उनले भने, ‘रियलको एउटा खेलको मूल्य कति छ, सबैलाई थाहा छ ।’ 

एक खेलको १० मिलियन युरो
फिफा क्लबले पाउनुपर्ने सुविधालगायत अन्य रकम फिफाले नदिँदा प्रतियोगिता रियलबाहेक अन्य क्लबले पनि भाग लिन नसक्ने उनको भनाइ छ । ‘फिफाले रकम नदिए हामीजस्तै अन्य क्लबले पनि निमन्त्रणा अस्वीकार गर्न सक्छन्,’ एन्सेलोटीले भने । रियलले सामान्यतया युइएफए खेल्दा प्रतिखेलबाट १० मिलियन युरो कमाउँछ ।

क्लब विश्वकप फुटबल प्रतियोगितामा एन्सोलोटी सर्वाधिक सफल प्रशिक्षक हुन् । उनले तीनपटक उपाधि जितेका छन् । पाँचपटक च्याम्पियन्स लिग विजेता प्रशिक्षक एन्सेलोटीले फिफाले फुटबलरको मर्म नबुझेको आरोप लगाएका छन् । ‘यतिवेला फिफा हामी फुटबलर र क्लबका मर्म बुझेजस्तो लाग्दैन,’ इटालीबाट प्रकाशित पत्रिका अन्तर्वार्ता दिँदै उनले भने, ‘रियलको एक खेलको भ्यालु २० मिलियन युरो रहेको छ, जुन फिफाले व्यहोर्नुपर्छ ।’ 

सुझावित समाचार