दोस्रो विश्वयुद्धको अन्त्यतिर मित्रसेनाले गरेको डी–डे अवतरणको अवसरमा बिहीबार फ्रान्सेली सहर कोलेभिल–सुर–मेरमा आयोजित विशेष समारोहमा अमेरिकी राष्ट्रपति जो बाइडेनले लोकतन्त्र अहिले पछिल्लो आठ दशकयताकै सबैभन्दा बढी जोखिममा रहेको बताए ।
सन् १९४४ जुनमा फ्रान्सको उत्तरी तट नर्मन्डीमा डेढ लाख मित्रशक्तिका सैनिक बेलायतबाट जहाजमार्फत आई अवतरण गरेका थिए । सो विशाल सैन्य अभियानमा बितेका सैनिकलाई श्रद्धाञ्जली दिँदै बाइडेनले आगामी दिनमा बलियो गठबन्धन महत्वपूर्ण हुने बताए ।
‘मित्रराष्ट्रहरूले ८० वर्षअघि मिलेर जे गरे, त्यो वास्तविक गठबन्धनले हामीलाई बलियो बनाउँछ भन्ने एउटा सशक्त दृष्टान्त थियो । त्यो पाठलाई हामीले कहिल्यै भुल्नुहुँदैन,’ राष्ट्रपति बाइडेनले भने । सम्बोधनका क्रममा बाइडेनले दुई वर्षभन्दा लामो समयदेखि रुसी आक्रमणको सामना गरिरहेको युक्रेनलाई अमेरिकाले एक्लै नछाड्ने पनि बताए ।
