नेपालले फिफा विश्वकप फुटबल प्रतियोगिताअन्तर्गत दोस्रो चरणको एसियन छनोटमा खराब प्रदर्शन जारी राखेको छ । साउदी अरबको दमाम सहरमा बिहीबार भएको खेलमा नेपाल युएईसँग ४–० ले पराजित भएको छ । नेपालले दुवै हाफमा समान दुई गोल व्यहोरेको थियो । नेपालले दोस्रो चरणको पाँच खेलमा विपक्षी पोस्टमा एक गोल पनि गर्न सकेको छैन, पाँच खेलमा १८ गोल व्यहोरेको छ । अब अन्तिम खेलमा मंगलबार नेपालले यमनको सामना गर्दै छ ।
एसियन छनोटको समूह ‘एच’मा नेपालले पाँच खेलमा एक जित पनि निकाल्न सकेन । नेपालले आफ्नो समूहमा सामना गरेको सबै प्रतिद्वन्द्वीसँग हारको सामना गरेको छ । युएईले पाँच खेलमा पाँचै जितका साथ सर्वाधिक १५ अंक बटुलेको छ । बहराइन ९ अंकका साथ दोस्रो तथा यमन ३ अंकसहित चौथो स्थानमा छ । पाँच खेल खेलेको नेपाल अंकविहीन छ । एएफसीले तटस्थ भूमिमा खेलाएको प्रतिस्पर्धामा नेपालको डिफेन्स फितलो रह्यो ।
दुई मिनेटको अन्तरमा नेपालले दुई गोल खाएको थियो । नेपालविरुद्ध दुवै गोल हरिब अलमुसारकले गरेका थिए । डिफेन्स लाइन सम्हालिन नपाउँदै युएईले खेलको १२औँ मिनेटमा अलमुसारकको गोलको मद्दतमा १–० को अग्रता लियो । अलहमादीको क्रसमा अलमुसारकले सटीक हेडिङ गरेका थिए । उनको हेडिङ रोक्न नेपालका कप्तान तथा गोलरक्षक किरणकुमार लिम्बू अगाडि आएका थिए । तर, उनले विपक्षी खेलाडीको हेडिङ गोल रोक्न सकेनन् ।
खेलको १४औँ मिनेटमा अलमुसारकले नेपालको कमजोर डिफेन्स लाइनको फाइदा लिँदै युएईलाई २–० को अग्रता लिए । डिबक्सभित्र अली सलेहको उत्कृष्ट पासमा उनले चिप गर्दै गोल गरेका हुन् । नेपालले मध्यान्तरअघि राम्रो अवसर गुमाएको थियो । दोस्रो चरणमा विपक्षी पोस्टमा एक गोल पनि गर्न नसकेको नेपालले युएईविरुद्ध अवसर निकालेको थियो । तर, नेपालले त्यसको सदुपयोग भने गर्न सकेन । खेलको ३६औँ मिनेटमा सनिशको क्रसमा जिलेस्पीजंग कार्कीको गोल प्रयास क्रसबारबाट माथि गएको थियो ।
नेपालको दुई प्रहार क्रसबारमा
खेलको ३७औँ मिनेटमा सनिशको क्रसमा नै सञ्जीव विष्टको हेडिङ क्रसबारमा लागेको थियो । खेलको ३८औँ मिनेटमा विशाल बस्नेतको प्रहार पनि क्रसबारमा लागेको थियो । पहिलो हाफको तुलनामा नेपालले दोस्रोमा केही सुधारिएको प्रदर्शन गरेको थियो । तर, गोल फर्काउन सकेन । मध्यान्तरपछिको सातौँ मिनेटमा अम्रोले युएईलाई ३–० को बलियो अवस्थामा राखे । उनले हमदनको पासमा सहजै डिबक्समा गोल गरे । खेलको ७५औँ मिनेटमा युएई ४–० ले अघि रह्यो । अब्बासले नेपाली डिफेन्सको कमजोर फाइदा लिँदै सहजै गोल गरे । नेपालका प्रशिक्षक भिन्सेन्जो अल्बर्टोले युएईविरुद्ध वसन्त जिम्बालाई पहिलो ११ मै राखेका थिए । खेलको २१औँ मिनेटमा वसन्त मैदानबाट बाहिरिएका थिए ।
नेपालले युएईसँग खेलेको यो तेस्रोपटक हो । यसअघि युएईसँग दुईपटक खेल्दा नेपाल दुवैपटक पराजित भएको थियो । नेपालले पहिलोपटक सन् १९८४ मा एसियन कप छनोटमा साउदी अरेबियामै युएईसँग खेलेको थियो । जसमा नेपाल ११–० को फराकिलो अन्तरले पराजित भयो । सन् २०२६ को विश्वकप छनोटको पहिलो खेलमा पनि नेपाल युएईसँग ४–० ले पराजित भएको थियो ।
कप्तान किरणको ९९ अन्तर्राष्ट्रिय खेल
नेपालका कप्तान तथा गोलरक्षक किरणकुमार लिम्बू नेपाली राष्ट्रिय टोलीबाट ९९ अन्तर्राष्ट्रिय खेल पुर्याएका छन् । युएईसँग खेल्दा उनले ९९ ‘क्याप’ पुर्याएका हुन् । छनोट चरणको आगामी मंगलबार यमनसँग दमाममा खेल्दा उनले सय खेल पूरा गर्नेछन् । किरणले २४ मे २००८ मा डेब्यु गरेका थिए । एएफसी च्यालेन्ज कपमा मकाउविरुद्ध पहिलोपटक खेलेका थिए । उनी पूर्वखेलाडी राजुकाजी शाक्य र विराज महर्जनको कीर्तिमान तोड्दै सर्वाधिक खेल खेल्ने खेलाडी बनेका थिए ।
