भ्रष्टाचारको मुद्दामा सजाय पाएको सात वर्षपछि पनि सरकारी शिक्षककै रुपमा जागिर खाएका एकजनालाई विशेष अदालतले भ्रष्टाचारका दुई दफाअनुसार सजाय सुनाएको छ ।
सोमबार विशेषले बाराका शिक्षक र प्रधानाध्यापकलाई कसूर कायम गर्दै सजाय निर्धारण गरेको हो ।
बाराका शिक्षक योगेन्द्रप्रसाद यादवलाई विशेष अदालतले भ्रष्टाचार निवारण ऐनको दुई वटा दफाअनुसार सजाय सुनाएको छ । विशेषका अध्यक्ष टेकनारायण कुँवर तथा सदस्यहरु तेजनारायण सिंह राई र रामबहादुर थापाको इजलासले यस्तो फैसला गरेको हो ।
यादवलाई विशेष अदालतले १६ वैशाख ०७३ मै भ्रष्टाचार मुद्दामा दोषी ठहर गरी सजाय सुनाएको थियो । विशेषका अध्यक्ष मोहनरमण भट्टराई तथा सदस्यहरु पवन कुमार शर्मा र महेशप्रसाद पुडासैनीको इजलासले यादवलाई चार महिना कैद र ८८ हजार चार सय २५ रुपैयाँ जरिवाना हुने सजाय सुनाएको थियो ।
यादव बाराको बरैनियास्थित श्रीराम प्राथमिक विद्यालय भर्वलियामा प्रधानाध्यापक हुँदा भ्रष्टाचार गरेको ठहर भएको थियो । उनले विद्यालय व्यवस्थापन समितिका अध्यक्षको दस्तखत किर्ते गरी पटक पटक रकम झिकेको भेटिएको थियो । यसैमा उनलाई विशेषले पहिलो पटक दोषी ठहर गरेको हो ।
उनले सो तथ्य ढाकछोप गरी उक्त कसूर र फैसलाको जानकारी कसैलाई दिएनन् । उनले सरकारी कागजात लुकाइ नेपाल राष्ट्रिय प्राथमिक विद्यालयबाट तलब भत्ताका साथै अवकाशपछिको निवृत्तिभरण समेत बुझेको भेटिएको छ । यस कसूरमा उनी दोस्रो पटक दोषी ठहर भएका छन् । उनलाई विशेषले दुई वटा कसूर गरेकोमा सजाय सुनाएको छ ।
उनलाई भ्रष्टाचार निवारण ऐनको दफा १२ बमोजिमको कसूरमा पनि सजाय सुनाइएको छ । उक्त दफामा सरकारी वा सार्वजनिक संस्थाको कागजात नोक्सान गर्नेलाई सजाय हुने उल्लेख छ । दफा १२ को कसूर गरेको भन्दै यादवलाई विशेषले एक वर्ष कैद तथा २० हजार रुपैयाँ जरिवाना हुने सजाय सुनाएको छ ।
भ्रष्टाचार निवारण ऐनको दफा १७ मा सार्वजनिक सम्पत्ति हानी नोक्सानी गर्नेलाई सजाय हुने उल्लेख छ । यादव यस कसूरमा पनि दोषी पाइएका हुन् ।
उनले १६ लाख ९२ हजार रुपैयाँभन्दा बढीको नोक्सानी गरेको पुष्टि भएको छ । विशेषले उक्त बिगो यादवबाटै असुलउपर हुने फैसला गरेको छ भने २ वर्ष ६ महिना कैद सजाय सुनाएको छ ।
यसै मुद्दामा नेपाल राष्ट्रिय प्राथमिक विद्यालयका तत्कालीन प्रधानाध्यापक धर्मेन्द्र प्रसाद यादव पनि दोषी ठहर भएका छन् । उनले शिक्षक योगेन्द्रप्रसादलाई विशेषबाट सजाय भइसकेपछि पनि सो तथ्य लुकाएका थिए ।
शिक्षक योगेन्द्रप्रसादले ३० जेठ ०७३ मा दिएको राजीनामा स्वीकृतिका लागि प्रधानाध्यापक यादवले सात वर्षपछि बल्ला जिल्ला शिक्षा कार्यालय बारामा लेखेर पठाएका थिए । त्यसै आधारमा भ्रष्टाचारको कसूर ठहर भइ मुद्दा अन्तिम भएको भन्दै राजीनामा स्वीकृत भएको थियो ।
तर शिक्ष योगेन्द्रप्रसादले निलम्बित अवधि र बर्खास्त भएको अवधिपछि समेत निवृत्तिभरण बुझेका थिए । शिक्षकको यस कसूरमा प्रधानाध्यापकले मतियार भइ काम गरेको भन्दै सजाय सुनाइएको छ । प्रधानाध्यापक धर्मेन्द्र प्रसाद यादवलाई विशेषले एक वर्ष तीन महिना कैद र ८ लाख ४६ हजार रुपैयाँभन्दा बढी जरिवाना हुने सजाय सुनाएको छ ।
यसै मुद्दाका अन्य पाँच वटै प्रतिवादीले सफाइ पाएका छन् । विशेषले वृजकिशोर प्रसाद, चेथारुप्रसाद कुर्मी, वेदप्रसाद पौडेल, दिनेशकुमार श्रेष्ठ र तुलाराम भण्डारीलाई सफाइ दिएको हो ।
