मापसे गर्नेलाई अब सडकमा खटाइने

महिनावारीको चार दिन महिला ट्राफिकलाई ड्युटीमा नखटाइने

उपप्रधानमन्त्री तथा गृहमन्त्री रवि लामिछानेले मादक पदार्थ सेवन गरेर सवारी चलाउनेलाई सजायस्वरूप प्रहरीसँगै ट्राफिक व्यवस्थापनमा खटाइने बताएका छन् । ट्राफिक नियम उल्लंघन गर्नेलाई स्वयंसेवकका रूपमा खटाउने गृहमन्त्रीको योजना छ ।

सामाजिक सञ्जालमार्फत गृहमन्त्रीले मंगलबार यससम्बन्धी जानकारी दिएका हुन् । महिनावारीको चार दिन महिला ट्राफिकलाई ड्युटीमा नखटाउने र ट्राफिक नियम मिच्ने चालकलाई नै स्वयंसेवकमा खटाउने उनको योजना छ ।

‘अबदेखि महिला ट्राफिक प्रहरीले महिनावारीका चार दिन सडकमा ड्युउटी गर्नुपर्दैन, मापसेलगायत ट्राफिक नियम उल्लंघन गर्नेले स्वयंसेवकका रूपमा उहाँहरूको साटो सडकमा सघाउनुहुनेछ,’ उनले लेखेका छन् ।

प्रहरी प्रधान कार्यालयले भने यसका लागि कानुनी व्यवस्था भइनसकेको जनाएको छ । हालको यातायातसम्बन्धी कानुनमा नियम मिच्नेलाई जरिवानाबाहेक अन्य सजायको प्रावधान छैन ।

त्यसकारण सडकमा खटाउनका लागि कानुन नै संशोधन गर्नुपर्ने अवस्था रहेको एक उच्च प्रहरी अधिकारीले बताए । अर्काेतर्फ स्वयंसेवकका रूपमा राम्रा मान्छेलाई खटाउने अवधारणा रहेको र नियम मिच्नेलाई नै खटाउँदा प्रभावकारी हुन नसक्ने ट्राफिक प्रहरी अधिकारीको टिप्पणी छ ।