यो वर्ष पाँचतारेको सूचीमा तीनवटा होटेल थपिएका छन् । पर्यटन विभागले भैरहवाको सिद्धार्थ भिलासा, लाजिम्पाटको दुसित प्रिन्सेस र धुम्बाराहीको अकामा होटेललाई पाँच तारा स्तरमा वर्गीकरण गरी इजाजतपत्र दिएको हो ।
पाँच तारा पाउने तीनवटा होटेलमा दुई सय ९७ कोठा रहेका छन् । सिद्धार्थ भिलासामा ८५, दुसित प्रिन्सेसमा १०७ र अकामा होटेलमा १०५ कोठा रहेका छन् । यससँगै पर्यटन विभागबाट पाँचतारे स्तरको इजाजात लिने होटेलको संख्या २२ पुगेको छ ।
थप चार होटेल पाँचतारेको मान्यता लिने पर्खाइमा रहेको विभागले जनाएको छ । धुलिखेलको दुसित थानी रिसोर्ट, लुम्बिनीको पवन प्यालेस, सोल्टी वेस्टेन्ट इटहरी, बुढानीलकण्ठको लेमन ट्रीलगायत होटेल पाँचतारा स्तर वर्गीकरणका लागि तयारी गरिरहेका छन् ।
साढे दुई दशकको हस्पिटालिटी अनुभव भएको सिद्धार्थ हस्पिटालिटी ग्रुपले भैरहवामा ‘सिद्धार्थ भिलासा’ सञ्चालनमा ल्याएको हो । यो ग्रुपको पहिलो पाँचतारे होटेल हो । होटेलको स्थलगत अनुगमन तथा निरीक्षण गरी स्तरोन्नति गरेको पर्यटन विभागले जनाएको छ । करिब पाँच बिघामा फैलिएको होटेलमा साना–ठूला गरी पाँचवटा कन्फ्रेरेन्स हल र पाँचवटै रेस्टुरेन्ट रहेका छन् । साढे दुई अर्ब लगानीमा सञ्चालनमा आएको होटेलमा १५ सयजना क्षमताको देशकै ठूलो ब्यांक्वेट हल रहेको सिद्धार्थ ग्रुपका सिइओ कृष्ण न्यौपानेले बताए । होटेलले पाँच तारा स्तरको मान्यता पाएसँगै व्यापारमा अझ राम्रो हुने विश्वास न्यौपानेको छ । होटेलमा क्यासिनो सञ्चालनमा आएपछि पाँच सयले रोजगारी पाउने उनको भनाइ छ । होटेलमा क्यासिनोका लागि संरचनासमेत निर्माण भइसकेको छ ।
भैरहवा–लुम्बिनी क्षेत्रमा आन्तरिक तथा बाह्य पर्यटन प्रवद्र्धनमा होटेलले ठूलो भूमिका निर्वाह गर्ने ग्रुपका अध्यक्ष लक्ष्मण न्यौपानेले बताए । सिद्धार्थ ग्रुपले ‘भिजन २०३०’ योजनाअन्तर्गत सन् २०३० सम्ममा स्वदेश तथा विदेशमा कम्तीमा ५८ वटा साना तथा ठूला आउटलेट सञ्चालन गर्ने योजना बनाएको छ । अगामी वर्ष कैलालीको धनगढी र तनहुँको दमौलीमा नयाँ होटेल तथा रुपन्देहीको योगीकुटीमा ब्यांक्वेटसहितको रेस्टुरेन्ट सञ्चालनमा ल्याउँदै छ । पृथ्वी राजमार्गमा रहेको सिद्धार्थ रिभरसाइड रिसोर्टलाई चारतारेमा स्तरोन्नति गर्ने काम भइरहेको छ ।
हालै पाँच तारा स्तरको स्तर वर्गीकरण भएको धुम्बाराहीको अकामा होटेल चार वर्षअघि सञ्चालनमा आएको हो । नौ रोपनी क्षेत्रफलमा फैलिएको होटेलमा गैरआवासीय नेपालीको लगानी छ । होटेल ल्हासा इन्टरनेसल समूहले अढाई अर्ब लगानीमा लाजिम्पाटमा सञ्चालनमा ल्याएको दुसित प्रिन्सेस होटेल पनि पाँच तारा स्तरको स्तर वर्गीकरण भएको छ । यही साउनदेखि सञ्चालनमा आएको यस होटेलको व्यवस्थापन थाइल्यान्डको प्रख्यात हस्पिटालिटी कम्पनी दुसित इन्टरनेसनलले सम्हालेको छ । १२ तलाको दुसित प्रिन्सेसमा रुफटप स्विमिङ पुल र बार छ ।
माघदेखि सञ्चालनमा आएको वर्णबास होटेलले पर्यटन विभागबाट लक्जरी बुटिक होटेलको मान्यता पाएको छ । व्यवसायी राजेन्द्र बजगाईंले करिब एक अर्बभन्दा बढी लगानीमा सञ्चालनमा ल्याएको होटेलमा ४८ कोठा छन्, जसमध्ये ६ वटा प्रेसिडेन्सियल स्विट र १८ वटा स्विट हुन् । होटेलको छानो सगरमाथा चुचुरोजस्तो आकृतिमा बनाइएको छ, जुन होटेलको आकर्षक पाटो हो । स्विमिङ पुलको नाम ‘गोक्यो’ राखेका छन् । होटेलमा ‘साउथ कोल’ नामक बार पनि छ । साउथ कोल र गोक्यो लेक सगरमाथा क्षेत्रमै पर्छन् ।
वर्णबासहित लक्जरी बुटिक होटेल तीन पुगेको पर्यटन विभागका अधिकृत तामाङले बताए । बत्तीसपुतलीको द्वारिकाज र सिंहदरबार दक्षिण ढोकाको बसेरा होटेलले यसअघि नै लक्जरी बुटिक होटेलको स्तर वर्गीकरण भई इजाजतपत्र पाइसकेका छन् । द्वारिकाज होटेल अतिविशिष्ट र विशिष्ट पाहुनाको पहिलो रोजाइमा पर्छ । लक्जरी बुटिकको मान्यता पाउनु पाँचतारे वा सोसरह रहेको उनको भनाइ छ ।
