प्यालेस्टिनी इस्लामिक लडाकु समूह (हमास)सँगको युद्ध पाँचौँ महिना प्रवेश गरेको वेला युद्धविराम सम्झौताका लागि पहल गर्न अमेरिकी विदेशमन्त्री एन्टोनी ब्लिंकेन बुधबार इजरायल आइपुगेका छन् ।
साउदी अरब, इजिप्ट र कतारपछि मध्यपूर्वको भ्रमणका क्रममा उनले इजरायलमा नेताहरूसँग भेटवार्ता गर्ने कार्यक्रम रहेको छ । द्वन्द्वको सुरुमा अस्थायी युद्धविरामको मध्यस्थता गरेको कतारले हमासले युद्ध रोक्नका लागि नयाँ प्रस्तावित सम्झौताको जवाफ दिएको बताएको छ ।
कतारका प्रधानमन्त्री मोहम्मद बिन अब्दुलरहमान अल थानीले ब्लिंकेनसँग दोहामा भएको भेटपछि भने, ‘जवाफमा केही थप माग समावेश भए पनि यो सकारात्मक छ ।’
ब्लिंकेनले हमासको जवाफ इजरायलसँग ‘साझा’ भएको र बुधबार त्यहाँ छलफल गर्ने बताएका छन् । उनले अझै धेरै काम गर्न बाँकी रहेको, तर सम्झौता सम्भव छ र वास्तवमै आवश्यक छ भन्ने कुरामा आफू विश्वस्त रहेको बताए ।
इजरायली गुप्तचर संस्था मोसादले पनि हमासको जवाफ प्राप्त गरेको इजरायली प्रधानमन्त्री बेन्जामिन नेतन्याहुको कार्यालयले जनाएको छ । नेतन्याहुले मंगलबार भनेका थिए, ‘हामी पूर्ण जितको बाटोमा छौँ र हामी रोकिनेछैनौँ ।’
इजिप्टसँग जोडिएको गाजाको दक्षिणी सीमामा रहेको राफा सहरतर्फ इजरायली सेनाले आक्रमण गरेपछि युद्धविरामका लागि दबाब बढेको छ ।
संयुक्त राष्ट्रसंघीय सहायता समन्वय कार्यालय ओसिएचएका प्रवक्ता जेन्स लार्कले भने, ‘स्पष्ट रूपमा भन्नुपर्दा, यस अवस्थामा राफामा हुने सम्भावित कारबाहीले ठूलो मात्रामा नागरिकको ज्यान लिन सक्छ र यसबाट बच्न हामीले आफ्नो शक्तिले भ्याएसम्म सक्दो प्रयास गर्नुपर्छ ।’
अक्टोबर ७ मा हमासले इजरायलमाथि गरेको आक्रमणमा एक हजार एक सय ६० जनाको मृत्यु भएको थियो । त्यसयता इजरायलले गाजामा आक्रमण गरिरहेको छ । यस आक्रमणमा २८ हजारभन्दा बढीको ज्यान गइसकेको छ । (रासस/एएफपी)
