सत्तारूढ गठबन्धनले आगामी ११ माघमा हुने राष्ट्रिय सभा निर्वाचनमा आफ्ना उम्मेदवार जिताउन ७७ वटै जिल्लामा समन्वय समिति गठन गर्ने भएको छ । सत्तारूढ गठबन्धनद्वारा गठित राष्ट्रिय सभा निर्वाचन केन्द्रीय समन्वय समितिको बुधबारको बैठकले समन्वय समिति गठन गर्ने निर्णय गरेको हो ।
संघीय लोकतान्त्रिक गणतन्त्रको रक्षाका लागि सत्तागठबन्धनका उम्मेदवारलाई विजयी गराउन जिल्ला तहसम्म समिति गठन गर्ने निर्णय भएको एकीकृत समाजवादीका उपाध्यक्ष राजेन्द्र पाण्डेले बताए । ‘सातै प्रदेश र ७७ वटै जिल्लामा समन्वय समिति गठन गर्ने निर्णय भएको छ,’ पाण्डेले भने । गठबन्धनले कांग्रेस नेता रमेश लेखकको संयोजकत्वमा चार सदस्यीय केन्द्रीय समन्वय समिति बनाएको छ । समितिमा माओवादीका उपमहासचिव वर्षमान पुन, एकीकृत समाजवादीबाट उपाध्यक्ष पाण्डे र जसपाबाट नेता मनीष सुमन छन् ।
सातवटै प्रदेशको गठबन्धनमा आबद्ध पार्टीहरूको मतसंख्या र मतभारबारे प्रारम्भिक विश्लेषणसमेत गरिएको लेखकले बताए । ‘सातवटै प्रदेशको मतसंख्या र मतभारको एकसरो विश्लेषण पनि गरिएको छ,’ लेखकले भने, ‘अब गठबन्धनको मत संगठित गरी उम्मेदवारलाई विजयी बनाउनका लागि प्रदेश र जिल्लामा समेत संगठित ढंगले काम अगाडि बढ्नेछ ।’
केन्द्र र प्रदेशमा गठबन्धनमा रहेका, तर उम्मेदवारी नदिएका साना दलहरूलाई पनि प्रदेश र जिल्लामा समेटेर समन्वय समिति बनाउने गठबन्धनले निर्णय गरेको छ । ‘हामी उम्मेदवार नभए पनि प्रदेश र जिल्लामा मत रहेका गठबन्धनका अन्य दललाई पनि समेटेर तल समन्वय समिति बनाउँछौँ,’ लेखकले भने । समन्वय निर्वाचन आयोगको कार्यतालिकाअनुसार सातवटै प्रदेशमा सोमबार ५२ जना उम्मेदवारले उम्मेदवारी दर्ता गराएका छन् । जसअनुसार गठबन्धनबाट कांग्रेसका १०, माओवादीका ६, एकीकृत समाजवादीका दुई र जसपाबाट एकजनाले उम्मेदवारी दर्ता गराएका छन् ।
१९ पदका लागि हुने निर्वाचनमा प्रमुख विपक्षी दल एमालेले भने सबै रिक्त पदमा उम्मेदवारी दिएको छ । आयोगबाट स्वीकृत निर्वाचन कार्यक्रमअनुसार बुधबार र बिहीबार मनोनयनपत्र र उजुरीउपर जाँचबुझ गरी नामावली प्रकाशित गर्ने, २७ पुसमा उम्मेदवारले नाम फिर्ता लिने तथा अन्तिम नामावली प्रकाशन गर्ने र २८ पुसमा उम्मेदवारलाई निर्वाचन चिह्न वितरणको कार्यक्रम रहेको छ ।
