नीति अधिवेशन गर्ने गरी हुन लागेको महासमिति बैठकबारे छलफलका लागि कांग्रेस सभापति शेरबहादुर देउवाले केन्द्रीय कार्यसम्पादन समितिको बैठक बोलाएका छन् । आगामी शुक्रबार बस्ने बैठकमा तीनवटा एजेन्डा तय भएको छ । मुख्यसचिव कृष्णप्रसाद पौडेलका अनुसार बैठकमा महासमिति बैठक, जाजरकोट भूकम्प र समसामयिक राजनीतिक एजेन्डा समावेश छन् ।
स्रोतका अनुसार बैठकमा सभापति देउवाले १६ देखि १९ पुससम्मका लागि तय भएको महासमिति बैठकको मिति सार्ने प्रस्ताव लाने तयारी गरेका छन् ।मध्यपुसमा ठण्डी बढ्ने र माघमा राष्ट्रियसभाको निर्वाचनमा ध्यानकेन्द्रित गर्नुपर्ने भएकाले फागुनका लागि महासमिति बैठकको मिति प्रस्ताव गर्नसक्ने नेताहरूको भनाइ छ ।
कांग्रेस नेता डा. शेखर कोइरालाले बुधबार इतर समूहको भेला बोलाएका छन् । भेलामा आफूपक्षीय पदाधिकारी, केन्द्रीय सदस्य, प्रदेश सभापति र १४औँ महाधिवेशनमा उम्मेदवार रहेकाहरूलाई बोलाइएको छ । केन्द्रीय सदस्य डा. गोविन्दराज पोखरेलका अनुसार भेला महासमिति बैठकमा प्रस्तुत हुने रणनीतिका विषयमा केन्द्रित हुनेछ । ‘कार्यसम्पादन समिति बैठकअघि इतर समूहको भेला बत्तीसपुतलीस्थित अनुपम फुडल्यान्डमा बस्न लागेको हो । छलफल महासमिति बैठक केन्द्रित हुनेछ,’ उनले भने ।
कोइरालाले मंगलबार भेला डाकेका थिए । तर, कुनै सल्लाहविना कोइरालाले भेलाको मिति तय गरेपछि महामन्त्री गगन थापा असन्तुष्ट बनेका थिए । मंगलबार नै थापाको मधेश प्रदेशमा कार्यक्रम तय भएको थियो । निर्धारित कार्यक्रम रद्द गरेर भेलामा सहभागी हुन नसक्ने भएपछि बुधबारका लागि भेला सारिएको हो । केन्द्रीय सदस्य अर्जुननरसिंह केसीले सबैको सल्लाहमा बुधबारका लागि बैठक सारिएको जानकारी दिए । ‘सबैको सहमतिमा बुधबारका लागि बैठक सारिएको हो । यसमा कुनै विवाद छैन,’ उनले भने । शुक्रबारका लागि तय कार्यसम्पादन समिति बैठकमा सभापति देउवाले महासमिति बैठकको मिति सार्ने प्रस्ताव गर्नसक्ने भएकाले इतर समूहले त्यसअघि नै आफ्नो धारणा तय गर्ने भएको छ ।
यस्तै, कांग्रेसले भूकम्प प्रभावित जाजरकोट र रुकुम पश्चिममा मंगलबारबाट दोस्रो चरणको कार्यक्रम थाल्ने भएको छ । महामन्त्री गगन थापाको संयोजकत्वमा बसेको भूकम्प प्रभावित क्षेत्र केन्द्रीय अनुगमन तथा व्यवस्थापन सहजीकरण समितिको बैठकले २६ मंसिरदेखि ६ पुससम्म दोस्रो चरणको कार्यक्रम गर्ने निर्णय गरेको हो । मुख्यसचिव कृष्णप्रसाद पौडेलका अनुसार बैठकले हजारवटा अस्थायी घरटहरा बनाउने अभियानअन्तर्गत दोस्रो चरणको कार्यक्रम घोषणा गरिएको हो । यसक्रममा अस्थायी घरटहरा निर्माणका लागि केन्द्रीय सदस्यको नेतृत्वमा घरटहरा निर्माण, समन्वय र सहजीकरणका लागि नयाँ टोली खटिने कांग्रेसले जनाएको छ ।
