युएईविरुद्ध नेपाल ४ - ० ले पराजित

फिफा विश्वकप छनोट

बिहिबार, ३० कार्तिक, २०८०
डिजिटल संस्करण

दोस्रो हाफमा सुधारिएको खेल प्रस्तुत गरे पनि नेपालले फिफा विश्वकप २०२६ का लागि चलिरहेको छनोटअन्तर्गत दोस्रो चरणको पहिलो खेलमा युएईविरुद्ध ४–० को हार व्यहोरेको छ । 

सबै गोल पहिलो हाफमा सम्भव भएका हुन् । युएईको घरेलु मैदानमा पहिलो हाफमा निकै कमजोर देखिएको नेपालले दोस्रो हाफमा सुधारिएको खेल प्रदर्शन गर्याे । जसका कारण थप गोल त खाएन नै, युएईविरुद्ध गोलका केही अवसर पनि सिर्जना गरेको थियो । तर, नेपाली खेलाडीले बललाई जाली चुमाउन भने सकेनन् । 

समग्रमा नेपालले ३४ प्रतिशत बल पोजिसन राख्दै युएईको पोस्टमा सातपटक प्रहार गर्याे । उता, युएईले भने १७ पटक नेपाली पोस्टमा बल प्रहार गरेको थियो । त्यसमध्ये नौ प्रहार सशक्त थिए, जसमा एक पेनाल्टी प्रहारसहित चार गोल सम्भव भयो भने अन्य प्रहारमा गोलरक्षक तथा कप्तान किरण चेम्जोङ पर्खाल बनेर उभिए ।


दुबईस्थित अल मक्टुम रंगशालामा भएको खेलमा युएईका लागि १०औँ मिनेटमा खलिफा मुबारकले हेडर गोल गर्दै युएईको खाता खोलेका थिए । 

३७औँ मिनेटमा प्राप्त गरेको पेनाल्टीमा सहज गोल गर्दै युएईका कप्तान अलीले व्यक्तिगत पहिलो र टिमका लागि दोस्रो गोल गरे । उनले ४४औँ मिनेटमा युएईलाई ३–० को अवस्थामा पुर्याए । यो उनको दोस्रो गोल थियो । 

अप्रत्याशित रूपमा तेस्रो गोल खाएपछि सम्हालिन नपाउँदै नेपालले चौथो गोल व्यहोर्याे । ४६औँ मिनेटमा फाबियो लिमाले उत्कृष्ट फिनिसिङ देखाउँदै युएईलाई ४–० को अवस्थामा पुर्याए ।

सुझावित समाचार