तीन ठूला दलका शीर्ष नेताले गणतन्त्रलगायत प्राप्त उपलब्धिको रक्षा तथा सुदृढीकरणका लागि १२ बुँदे समझदारी पक्षधर शक्तिको समीक्षा बैठक बोलाउने निर्णय गरेका छन् । प्रधानमन्त्रीनिवास बालुवाटारमा बुधबार बिहान प्रधानमन्त्री एवं माओवादी अध्यक्ष प्रचण्ड, कांग्रेस सभापति शेरबहादुर देउवा र एमाले अध्यक्ष केपी ओलीबीच भएको छलफलमा संविधान र गणतन्त्र सुदृढ तथा रक्षाका लागि समीक्षा बैठक बोलाउने समझदारी गरेका हुन् ।
माओवादी उपाध्यक्ष एवं प्रवक्ता अग्नि सापकोटाले प्राप्त उपलब्धिको रक्षा र सुदृढीकरणका लागि समीक्षा बैठक बोलाउने समझदारी भएको बताए । ‘१२बुँदे समझदारीका पक्षधरहरू, अग्रगमनका पक्षधर, परिवर्तनका पक्षधरहरूबीच संविधान र गणतन्त्र रक्षा एवं सुदृढ गर्न समीक्षा बैठक बोलाउने समझदारी भएको छ,’ सापकोटाले भने, ‘अराजकता नियन्त्रण गर्न र सहमतिमा राष्ट्रिय दृष्टिकोण निर्माणका लागि बैठक हुँदै छ ।’
कांग्रेस प्रचार विभाग प्रमुख मीन विश्वकर्माले दलहरूबीच स्वच्छ प्रतिस्पर्धा हुनुपर्छ र व्यवस्थामाथि उठेका प्रश्नको सामूहिक जवाफ दिनुपर्छ भन्ने नै छलफलको सार रहेको बताए । ‘१२बुँदे समझदारीपछिको शान्ति प्रक्रिया, संविधान निर्माणदेखि अहिलेको उपलब्धिबारे जनतालाई बुझाउन नसकेको हो कि हामी आफैँले बुझ्न नसकेको हो, समीक्षा गर्नुपर्छ । प्राप्त उपलब्धिको रक्षाका लागि दलहरूबीच स्वच्छ प्रतिस्पर्धा हुनुपर्छ । व्यवस्थामाथि उठेका प्रश्नको भने सामूहिक जवाफ दिनुपर्छ भन्ने छलफलको सार हो,’ विश्वकर्माले भने ।
बुधबार नै पार्टी कार्यालय पेरिसडाँडामा आयोजित उपत्यकाका केन्द्रीय सदस्यहरूको बैठकमा प्रधानमन्त्री प्रचण्डले संघीय लोकतान्त्रिक गणतन्त्रविरुद्ध षड्यन्त्र भइरहेको बताएका छन् । उनले १२ बुँदे समझदारी, शान्ति सम्झौता र संविधान निर्माणका पक्षधर शक्ति एकैठाउँमा उभिनुपर्नेमा जोड दिएका छन् । हिजो विभिन्न काण्ड मच्चाउनेहरूले नै आज शान्ति र जनताको कुरा गरिरहेको भन्दै प्रचण्डले चेतावनी दिए, ‘जनताको भावना भड्काएर परिवर्तन उल्टाउन सकिन्छ कि भन्ने कसैले नसोच्दा हुन्छ । त्यस्ता षड्यन्त्र लोकतान्त्रिक शक्तिहरू मिलेर परास्त गरिन्छ ।’
