भारतसँग पराजित भएसँगै नेपाल एसियाडको पुरुष क्रिकेटबाट बाहिरियाे
१९औँ एसियन खेलकुद प्रतियोगिता (एसियाड)अन्तर्गत क्रिकेटको पहिलो क्वार्टरफाइनलमा नेपाल भारतसँग २३ रनले पराजित भएको छ । पहिलो ब्याटिङ गरी भारतले २० ओभरमा चार विकेट गुमाएर दुई सय दुई रनको योगफल बनाएको थियो । नेपालले दुई सय तीन रनको चुनौतीपूर्ण लक्ष्य पायो । युनिभर्सिटी मैदानमा भारतले टस जितेर ब्याटिङ निर्णय लिएको थियो ।
प्रत्युत्तरमा नेपालले २० ओभरमा नौ विकेटको नोक्सानीमा एक सय ७९ रन जोडेको थियो । हारसँगै नेपाल एसियाडको पुरुष क्रिकेटबाट बाहिरिएको छ । भारतले सेमिफाइनल स्थान सुरक्षित गरेको छ ।
नेपालको ब्याटिङमा दीपेन्द्रसिंह ऐरीले सर्वाधिक ३२ रनको योगदान दिएका थिए । उनले १५ बलमा चार छक्का प्रहार गरेका थिए । यसैगरी कुशल मल्ल र सन्दीप जोराले समान २९ रन बटुले । कुशलले २२ बलमा समान दुई चौका र छक्का हिर्काए । सन्दीप जोराले १२ बलमा तीन छक्का र एक चौका प्रहार गरे । करण केसीले १३ बलमा दुई छक्का र एक चौकाको सहयोगमा १८ रन बनाए । भारतले नेपाललाई १२ अतिरिक्त रन दिएको थियो ।
नेपाल र भारतबीच पहिलोपटक अन्तर्राष्ट्रिय टी–२० खेल भएको हो । गत महिना नेपाल पाकिस्तान र श्रीलंकामा संयुक्त रूपमा आयोजना भएको एसिया कपमा भारतविरुद्ध पहिलोपटक एकदिवसीय खेलमा भिडेको थियो । जसमा भारत १० विकेटले विजयी भएको थियो । अन्तर्राष्ट्रिय टी–२० को पहिलो भेटमा भारतले नेपाललाई हराउन मिहिनेत गर्नुपरेको थियो । सन् २००७ मा दक्षिण अफ्रिकामा भएको आइसिसी टी–२० विश्वकपको भारत विजेता हो । नेपालले सन् २०१४ मा पहिलो अन्तर्राष्ट्रिय टी–२० खेल खेलेको थियो ।
यशस्वीको शतकीय इनिङ्स
भारतका लागि भारतीय बायाँहाते युवा ब्याट्सम्यान यशस्वी जयसवालले नेपालविरुद्ध कीर्तिमानी शतक प्रहार गरेका थिए । उनले ४८ बलमा आठ चौका र सात छक्का प्रहार गरेका थिए । सोमपाल कामीको १६.५ ओभरमा एक रन बटुल्दै उनले शतक पूरा गरेका थिए ।
१९.४ ओभरमा उनले छक्का प्रहार गरेको सम्झी शतकको सेलेब्रेसन गरेका थिए । अम्पायरले चौकाको संकेत गरेपछि जयसवालले ९९ रनमै रोकिए र अर्कोपटक उनले शतक पूरा गरे । उनी भारतीय टोलीका लागि कम उमेरमा अन्तर्राष्ट्रिय टी–२० खेलमा शतक प्रहार गर्ने खेलाडी बनेका छन् । जयसवालले २१ वर्ष दुई सय ७९ दिनमा शतक पूरा गरेका हुन् ।
भारतका लागि शुभमन गिलले गत फेब्रुअरीमा न्युजिल्यान्डविरुद्ध २३ वर्ष एक सय ४६ दिनमा एक सय २६ रनको शतकीय इनिङ्स खेलेका थिए । अन्तर्राष्ट्रिय टी–२० मा फ्रान्सका गुस्तभ म्याकेओनले १८ वर्ष दुई सय ८० दिनमा स्विट्जरल्यान्डविरुद्ध शतक हानेका थिए । नेपालका कुशल मल्लले एसियाडअन्तर्गत समूह चरणमा मंगोलियाविरुद्ध १९ वर्ष दुई सय ६ दिनमा शतक हानेका थिए ।
भारतका लागि रिंकु सिंह र शिभव डुबेले पाँचौँ विकेटका लागि २२ बलमा विस्फोटक ५२ रनको साझेदारी गरेका थिए । गत सिजनको इन्डियन प्रिमियर लिगमा चम्केका रिंकुले १५ बलमा ३७ रनको इनिङ्स खेले । कोलकाता नाइट राइडर्सका विस्फोटक ब्याट्सम्यानका रूपमा चनिने रिंकुले दुई चौका र चार छक्का प्रहार गरे । शिभमले १९ बलमा दुई चौका र एक छक्का ठोके ।
नेपालका बलर खर्चिला
बलिङमा नेपालका लागि दीपेन्द्रसिंह ऐरीले चार ओभरमा ३१ रन खर्चेर दुई विकेट हात पारे । सोमपाल कामीले चार ओभरमा ३८ रन दिँदै एक विकेट लिए । यसैगरी सन्दीप लामिछानेले तीन ओभरमा एक विकेट लिन २८ रन खर्चेका थिए । करण केसी, अभिनाश बोहाेरा र रोहित पौडेल विकेटविहीन रहे । दीपेन्द्रले भारतीय कप्तान ऋतुराज गायकवाडको विकेट लिए । उनी २३ बलमा चार चौकासहित २५ रनमा आउट भएका थिए । पहिलो विकेटका लागि जयसवाल र गायकवाडले ९.५ ओभरमा एक सय तीन रनको शतकीय साझेदारी गरेका थिए ।
