सरकार आफैँले मुलुकमा आतंककारी क्रियाकलापलाई प्रोत्साहित गरिरहेको छ : ओली

प्रमुख प्रतिपक्ष दल नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीले सरकार आफैँले मुलुकमा आतंककारी क्रियाकलापलाई प्रोत्साहित गरिरहेको आरोप लगाएका छन्।

कांग्रेस नेता महेन्द्र यादवमाथि खुकुरी प्रहार भएको घटना र ताप्लेजुङमा डिएसपीसहित उनको परिवारलाई मार्छु भन्ने धम्की दिनेलाई नियन्त्रणमा नलिएर सरकारले आतंककारी गतिविधिलाई प्रोत्साहित गरिरहेको उनको आरोप छ।

‘अस्ति यहाँ खुकुरी हान्ने मान्छेले त माइतीघर मण्डलामा खुकुरी हान्छु भनेकै थियो त पहिले नै। २-४ दिनअगाडि नै खुकुरी हान्छु भनेको थियो। लात्ती हान्छु भनेर खुट्टा उचालेकै थियो। अनेक गरेको थियो त उसले। मान्छेहरूको नाम लिएको थियो। मान्छेहरूको नाम लिइलिईकन काट्छु भन्दाखेरी सरकार कानमा तेल हालेर बसेको थियो,’ उनले भने।

अध्यक्ष ओलीले अमानवीय र गैरकानुनी क्रियाकलापमा साथ दिन्नँ भनेर डिएसपी राजन राईले भनेपछि त्यसलाई सहन नसकेर उनी र उनको परिवारलाई ज्यान मार्ने धम्की दिनेहरूलाई सरकारले पक्राउ नगरेको भन्दै आपत्ति जनाए।