कक्षा ११ मा छात्रवृत्ति कार्यक्रमका लागि काठमाडौं महानगरपालिकामा १२ हजार नौ सय ७९ जनाले आवेदन दिएका छन् । २८ असारदेखि आवेदन फाराम खुलाएकोमा सोमबार अन्तिम दिनसम्ममा ६ हजार नौ सय ७२ जनाले अनलाइन र ६ हजार सातजनाले लिखित फाराम बुझाएका हुन् ।
यसमध्ये महानगरपालिकाको शिक्षा विभागले छनोट गरी सीमित विद्यार्थीलाई छात्रवृत्ति कोटामा अध्ययनका लागि सम्बन्धित विद्यालयलाई सिफारिस गर्नेछ । महानगरका शिक्षा विभाग प्रमुख सीताराम कोइरालाका अनुसार सबैभन्दा धेरै आवेदन विज्ञान विषय अध्ययनतर्फ परेको छ ।
सीताराम कोइराला, शिक्षा विभाग प्रमुख, काठमाडौं महानगरपालिका
आवेदन भरेकामध्ये महानगरपालिकाको शिक्षा विभागले छनोट गरी सीमित विद्यार्थीलाई छात्रवृत्ति कोटामा अध्ययनका लागि सम्बन्धित विद्यालयलाई सिफारिस गर्नेछ । सबैभन्दा धेरै आवेदन विज्ञान विषय अध्ययनतर्फ परेको छ ।
फाराम भरेकामध्येबाट छनोट गरी २२ साउनसम्म महानगरले सिफारिस गरिसक्नेछ । यसअघि २० साउनमा छात्रवृत्तिका लागि परीक्षा हुनेछ । महानगरले प्रदान गर्ने छात्रवृत्ति कोटामा प्राविधिक धारसहितका सबै संकाय समेटिनेछ । सहभागीले सय पूर्णांकको परीक्षा दिनुपर्नेछ । फाराम भरेकामध्ये करिब पाँच हजार विद्यार्थीले मात्रै छात्रवृत्तिमा पढ्न पाउनेछन् । यसमध्ये १ प्रतिशत (करिब ५० जना) ल्यान्डफिल्ड साइट सिसडोल र बन्चरेडाँडाका सामुदायिक विद्यालयका लागि उपलब्ध गराइनेछ ।
सरकारले ०६७ देखि नै निजी विद्यालयले १० प्रतिशत छात्रवृत्ति दिनुपर्ने घोषणा गरेको थियो । तर, उनीहरूले आफूखुसी छात्रवृत्ति कार्यक्रम चलाइरहेका थिए । छात्रवृत्ति कार्यक्रम प्रभावकारी नभएको भन्दै महानगरले यसपटक सबै निजी स्कुललाई कक्षा ११ को १० प्रतिशत कोटा खाली राखेर विद्यार्थी भर्ना गर्न निर्देशन दिएको हो ।
८५ प्रतिशत विद्यार्थी सामुदायिक विद्यालयबाट छनोट हुने
महानगरका अनुसार यहाँका निजी स्कुलहरूमा कक्षा ११ मा झन्डै ५० हजार विद्यार्थी भर्ना हुन्छन् । त्यसमध्ये १० प्रतिशत अर्थात् पाँच हजारलाई छात्रवृत्ति प्रदान गर्न लागिएको हो । यसमध्ये पनि ८५ प्रतिशत अर्थात् चार हजार दुई सयभन्दा बढी विद्यार्थी सामुदायिक विद्यालयबाट छनोट हुनेछन् । अन्य १५ प्रतिशत निजी स्कुलबाट आएका विद्यार्थीको योग्यता र क्षमताका आधारमा प्रदान गरिनेछ । महानगरभित्र दुई सयभन्दा बढी निजी विद्यालयमा ११ र १२ कक्षासम्म पढाइ हुन्छ ।
कसलाई कति कोटा ?
छात्रवृत्ति कार्यक्रमका लागि महानगरले कोटा छुट्याएको छ । जसमध्ये खुला ४० प्रतिशत, आरक्षण कोटा ४५ प्रतिशत, महानगरभित्रका स्थायी बसोवासी ९ प्रतिशत, १ प्रतिशत बन्चरेडाँडा र सिसडोलका सामुदायिक विद्यालयबाट आएका विद्यार्थी र ५ प्रतिशत निजी विद्यालयका उत्कृष्ट तथा जेहेनदार विद्यार्थीलाई प्रदान गरिनेछ । आरक्षण कोटा ४५ प्रतिशतभित्र ३३ प्रतिशत छात्रा र १२ प्रतिशत मधेसी रहनेछन् ।
