सञ्चालकका लागि आठदेखि १० वर्ष कैद सजाय माग
बागलुङमा सञ्चालित इमेज बचत तथा ऋण सहकारी संस्थाका अध्यक्ष तथा ढोरपाटन नगरपालिकाका प्रमुख देवकुमार नेपालीसहित ११ जनाविरुद्ध ठगी मुद्दा दर्ता भएको छ । सहकारीपीडितले सरकारी वकिलको कार्यालयमार्फत जिल्ला अदालत बागलुङमा ठगी मुद्दा दर्ता गरेका हुन् ।
मेयर नेपालीसहित उनकी श्रीमती छेला नेपाली, कार्यबाहक अध्यक्ष डोरबहादुर परियार, सचिव सुनील नेपाली, कोषाध्यक्ष लक्ष्मी सेन, सदस्य चित्रबहादुर भण्डारी, रूपा विक र झकबहादुर शाहीविरुद्ध मुद्दा दर्ता गरिएको संघर्ष समितिका संयोजक डिलबहादुर कार्कीले जानकारी दिए । कुल एक अर्ब ३० करोड बिगोदाबीसहित १५ सय ४३ जनाको हस्ताक्षरसहित अदालतमा सहकारी मुद्दा दर्ता भएको जिल्ला न्यायाधिवक्ता स्वतन्त्र न्यौपानेले बताए । सञ्चालकका लागि आठदेखि १० वर्ष कैद सजाय माग गरिएको छ ।
बचतकर्ताको रकम हिनामिना पारेर बेपत्ता भएका सहकारीका संस्थापक अध्यक्षसमेत रहेका मेयर नेपालीलाई खोजी गरी बचत रकम फिर्ताको माग गर्दै पीडितले प्रहरीमा जाहेरी दिएका थिए । उनी झन्डै दुई महिनादेखि बेपत्ता छन् । उनलाई पक्राउको माग गर्दै बचतकर्ताले सडक आन्दोलनसमेत गरेका छन् ।
एक अर्ब ३० करोड रुपैयाँ बिगोदाबी गरेर मुद्दा दर्ता गरिए पनि अहिले झन्डै दुई अर्ब रकम हिनामिना भएको पीडितहरूको भनाइ छ । ‘अहिलेसम्म सहकारीको एक अर्ब ५१ करोड हिनामिना भएको देखिएको छ,’ संघर्ष समितिका संयोजक कार्कीले भने, ‘केही पीडित मुद्दा दर्ता गर्नै आएका छैनन् । केहीले आयस्रोत देखाउन नसक्ने भएर दर्ता गर्न चाहेका छैनन् । हालसम्म १५ सय ४३ जनाले मुद्दा दर्ता गरेका छौँ । दैनिक यो संख्या बढ्दै गएको छ ।’ उनले मेयर नेपाली सम्पर्कमा नआएको पीडितहरू ठगी मुद्दा लिएर अदालत पुगेको बताए ।
सञ्चालकसमेत रहेका नेपाली बेपत्ता भएपछि बचतकर्ता चरणबद्ध आन्दोलनमा छन् । उनीहरूले जिल्लाका राजनीतिक दल र विभिन्न सरोकारवाला निकायसँग आफ्नो रकम फिर्ताका लागि सहजीकरण गरिदिन आग्रहसमेत गरेका छन् । पीडितहरूले नेपालीलगायत अन्य सञ्चालकलाई इन्टरपोलमार्फत पक्राउ गर्न माग गरेका छन् । बागलुङ सदरमुकामसहित गलकोट, बुर्तिबाङ र पोखरामा पनि शाखा रहेको इमेज सहकारीमा आकर्षक ब्याज दिने आश्वासनका कारण सयौँले बचत गरेका थिए । सेयर सदस्य नभएकाहरू धेरैसँग सहकारीले कारोबार गरेको थियो । गत ७ वैशाखदेखि इमेज सहकारी संस्था बन्द छ । सुरुमा तरलता अभाव भनिए पनि त्यसपछि सहकारी खुलेको छैन ।
