आयसर कमर्सियल भेहिकलको नेपालको आधिकारिक विक्रेता बतास एमएडब्लू कमर्सियल भेहिकल्स प्रालिले भोल्भो आइसर कमर्सियल भेहिकल्स इन्डियाको सहकार्यमा फाइनान्सर्स भेला आयोजना गरेको छ । कम्पनीले बैंकर्स तथा व्यवसायीहरूलाई साथ तथा सहकार्यका लागि कृतज्ञता जाहेर गर्ने, बतास अर्गनाइजेसन र एमएडब्लू कमर्सियलबीच भएको साझेदारीको विषयलाई उजागर गर्ने र आउँदा दिनहरूमा साझेदार कम्पनीको योजनालाई प्रस्तुत गर्ने उद्देश्यसहित मेला आयोजना गरेको हो ।
कम्पनीका प्रमुख कार्यकारी अधिकृत दीपककुमार अग्रवालले भेलामा करिब एक सय ५० जना बैंकिङ तथा वित्तीय क्षेत्रका व्यक्ति, विभिन्न विधाका व्यवसायी, कमर्सियल भेहिकल्स क्षेत्रका अगुवा, यातायात संघका कार्यकारीहरू र विज्ञहरूको सहभागिता रहेको जानकारी दिए । कार्यक्रममा भोल्भो आइसर कमर्सियल भेहिकल इन्डियाका प्रमुख यसयस गिल तथा अन्य उच्च व्यक्तिको पनि उपस्थिति रहेको जनाइएको छ ।
नवीनता, दिगोपन र ग्राहककेन्द्रित समाधानमा साझा फोकसका साथ बतास एमएडब्लूले कमर्सियल भेहिकल्सको परिदृश्यलाई पुनः परिभाषित गर्ने र ग्राहकका लागि असाधारण अनुभवहरू सिर्जना गर्ने लक्ष्य राखेको कम्पनीका अध्यक्ष विष्णुकुमार अग्रवालले बताए । आयसर यात्राको सफलता र निरन्तरताका लागि विशेष भूमिका बैंकर्स र ग्राहकको रहेको र सहयोग, साझेदारीका लागि कम्पनीका सहअध्यक्ष आनन्दराज बतासले आभार जनाएका थिए । उनले आयसर ब्रान्डलाई कमर्सियल भेहिकल्स क्षेत्रका ग्राहकमा अझै बढी लोकप्रिय बनाउन आउँदा दिनमा पनि सहयोग र साथ दिन आग्रह गरेका थिए । कार्यक्रममा एभरेस्ट, नेपाल इन्भेस्टमेन्ट मेगा बैंक, ग्लोबल आइएमई बैंकलगायत कुल नौ बैंकलाई सम्मान गरिएको कम्पनीले जनाएको छ ।
कम्पनीका प्रबन्धक सञ्चालक शान्तराज बतासले टेलिमेटिक्स प्रविधिको कार्यान्वयन र हरेक ५० किलोमिटरमा सर्भिस नेटवर्क विस्तारका माध्यमबाट ग्राहकको सन्तुष्टि बढाउने बताए । यसका लागि उनले कम्पनीको रणनीतिक योजना सार्वजनिक गरेका थिए ।
