आइसिसी विश्वकप ग्लोबल छनोटअन्तर्गत सातौँ स्थानको प्लेअफमा नेपालले आयरल्यान्डलाई दुई सय ६९ रनकाे लक्ष्य दिएको छ।
जिम्बावेको हरारेमा जारी प्रतियोगिताको अन्तिम खेलमा नेपालले निर्धारित ५० ओभरमा ९ विकेटको क्षतिमा दुई सय ६८ रन बनायो। आयरल्यान्डसामु ‘फाइटिङ टोटल’ राख्ने क्रममा गुल्सन झाले सबैभन्दा बढी ५७ रनको योगदान दिए।
४२ बल सामना गरेका गुल्सनले तीन छक्का र चार चौका प्रहार गरे। यस्तै, अर्जुन साउदले ४८, कुशल मल्लले ४४, सन्दीप लामिछानेले ३२, रोहित पौडेलले २९ र भीम सार्कीले २० रनको योगदान दिए।
अन्य ब्याटरले दोहोरो अंकमा रन बनाउन सकेनन्। कुशल भुर्तेल ८, ज्ञानेन्द्र मल्ल ७, दीपेन्द्रसिंह ऐरी शून्य र किरण केसीले चार रन बनाए। किशोर महतो एक रनमा अविजित रहे।
नेपालले ३७।२ ओभरभित्र एक सय ६९ रनमा सात विकेट गुमाइसकेको थियो। यस्तोमा गुल्सन र सन्दीपले ८० रनको साझेदारी गर्दै नेपाललाई फाइटिङ टोटलसम्म पुर्याए। त्यसअघि अर्जुन र रोहितबीच ५० रनको महत्वपूर्ण साझेदारी बनेको थियो।
