पूर्वाञ्चल विश्वविद्यालय सरोकार समाजले सेवा आयोगका अध्यक्ष प्रा.डा. महेशराज दाहालमाथि कालोमोसो पोखेर दुर्व्यवहार गर्ने कार्यमा संलग्नलाई कारबाही गर्न माग गरेको छ।
आइतबार विश्वविद्यालयका उपकुलपतिलाई ध्यानाकर्षण-पत्र बुझाउँदै समाजका पदाधिकारीले घटनामा संलग्नहरूलाई कारबाहीका लागि थप दबाबका साथ अघि बढ्न अनुरोध गरे। ‘विश्वविद्यालयमा हुने अमर्यादित गतिविधिहरूलाई तत्काल नियन्त्रण गरी विधि र पद्धतिमा सञ्चालन गर्न उपकुलपतिज्यूमार्फत सम्पूर्ण विश्वविद्यालयको ध्यानाकर्षण गराउँदछौँ,’ समाजका अध्यक्ष संजीव रोकाहाद्वारा हस्ताक्षरित पत्रमा भनिएको छ।
२९ जेठमा घटेको घटनामा संलग्न सबै अभियुक्तहरू अझै पक्राउ नहुनु र उनीहरूको संरक्षक र योजनाकारहरूको स्पष्ट किटान गर्न नसक्नु दुःखद भन्दै समाजले भनेको छ, ‘नियोजित र योजनाबद्ध घटाइएको यस प्रकारका घटनालाई सामान्य रूपमा बुझ्ने दुष्प्रयास कोही कसैको नहोस्। हामी खबरदारी गर्न चाहन्छौँ।’
