काठमाडौं उपत्यका अपराध अनुसन्धान कार्यालयका प्रमुख एसएसपी डा. केसी भन्छन्— सट्टेबाज धन्दामा पक्राउ परेको यो हालसम्मकै ठूलो घटना हो ।
प्रहरीले विश्वमा सञ्चालित विभिन्न खेलमा सट्टेबाज लगाउने धन्दामा संलग्न पाँच अभियुक्तलाई पक्राउ गरेको छ । पक्राउ पर्ने कैलाली लम्कीचुहा नपा– १० का २९ वर्षीय दिनेश खड्का, काभ्रे पाँचखाल नपा– ४ की २८ वर्षीया अनिता धिताल, भक्तपुर मध्यपुरठिमी नपा– ४ का २७ वर्षीय दीपेश श्रेष्ठ, कञ्चनपुर भीमदत्त नपा– १८ का २५ वर्षीय दिनेश चन्द र नुवाकोट ककनी गापा– ७ का २४ वर्षीय आशिष लामिछाने रहेका छन् । सट्टेबाज खेलाउने क्रममा उनीहरूको बैंक खाताबाट ७४ करोड १३ लाख ५० हजार सात सय १३ रुपैयाँ कारोबार भएको देखिएको प्रहरीले जानकारी दिएको छ ।
काठमाडौं उपत्यका अपराध अनुसन्धान कार्यालयका प्रमुख एसएसपी डा. मनोज केसीका अनुसार धन्दाका मुख्य योजनाकार दिनेश हुन् । उनको खाताबाट मात्रै ६४ करोड रुपैयाँको कारोबार भएको देखिएको छ । कारोबारका लागि उनले जंगल, पुकुडन, पिंकी, पिन्टु, गुल्लु, अनियन– १ जस्ता १२ अकाउन्टबाट कनेक्ट आइपिएस अकाउन्ट खोलेका थिए । उनले वान एक्स बेटमार्फत सट्टेबाज धन्दा चलाउँदै आएका थिए । धन्दामा उनले प्रेमिका अनितालाई पनि सामेल गराएका थिए । उनले मोबाइलमा बाइनेन्स अकाउन्ट खोली अमेरिकी डलर खरिद गर्दै आएकी थिइन् ।
धन्दामा संलग्नमध्ये दीपेशले विभिन्न चारवटा सिमकार्ड प्रयोग गरी इसेवा लिएका थिए । उनले उक्त खातामार्फत ५९ लाख २९ हजारको कारोबार गरेको देखिएको छ । उनले विभिन्न बैंकमा रहेको खातामार्फत कारोबार गर्दै आएका थिए । सबै गरी उनको बैंक खातामा सीमित अवधिभित्र पाँच करोड ५४ लाख ६६ हजारको कारोबार भएको खुलेको छ ।
आशिषले पनि विभिन्न बैंकमार्फत दुई करोड ९८ लाख ९६ हजारको कारोबार गरेको खुलेको छ । उनीबाट प्रहरीले ३५ लाख रुपैयाँ नगद बरामद गरेको छ । उनी चार्टर अकाउन्टेन्ट हुन् । उनले सट्टेबाजका क्रममा हुने सबै कारोबारको अकाउन्ट अडिट गर्थे । जसको उनी निश्चित रकम कमिसनबापत बुझ्थे ।
त्यस्तै, पक्राउ पर्नेमध्ये दिनेशको बैंक खातमा भने ४५ लाख रुपैयाँको कारोबार भएको अनुसन्धानबाट खुलेको छ । अनुसन्धानमा संलग्न काठमाडौं उपत्यका अपराध अनुसन्धान कार्यालयका प्रमुख एसएसपी डा. केसीका अनुसार सट्टेबाज धन्दामा पक्राउ परेको यो हालसम्मकै ठूलो घटना हो ।
उनले भने, ‘सट्टेबाज धन्दामा संलग्न हुने अभियुक्तबाट यति ठूलो रकमको कारोबार भएको हालसम्म फेला परेको थिएन । पक्राउ परेकामध्ये केही धन्दाका खास एजेन्ट हुन् । यिनीहरूले धेरैबाट रकम असुल गरेको र क्रिप्टोमार्फत रकम लेनदेन गरेको देखिन्छ जुन गैरकानुनी हो ।’
