अर्जेन्टिनी कप्तान लियोनल मेसी दुई घन्टा बेइजिङ अन्तर्राष्ट्रिय एयरपोर्टमा रोकिएका छन् । बेइजिङको वर्कर्स रंगशालामा १५ जुनमा अर्जेन्टिना र अस्ट्रेलियाबीच अन्तर्राष्ट्रिय मैत्रीपूर्ण खेल हुँदै छ । यसै मैत्रीपूर्ण खेलमा सहभागी हुन मेसी बेइजिङ पुगेका हुन् । उनले विमानस्थलमा अर्जेन्टिना र स्पेनका राहदानी देखाएका थिए । बेइजिङ विमानस्थलमा पुगेलगत्तै उनलाई चिनियाँ प्रहरीले नियन्त्रणमा लिए ।
मेसीले चीनको भ्रमणमा स्पेनको राहदानी देखाएका थिए । चीनमा स्पेनको राहदानीमा अनिवार्य भिसा लाग्नुपर्छ । स्पेनको राहदानीका साथ चीनको भ्रमण गर्दा भिसा प्रक्रिया पूरा गर्नुपर्छ । विनाभिसा प्रवेश दिइनेछैन । तर, विश्व च्याम्पियन अर्जेन्टिनी कप्तान मेसीले स्पेनको राहदानीमा भिसा लागेको छाप देखाउन सकेनन् ।
यही कारण चिनियाँ प्रहरीले मेसीलाई विमानस्थलमै रोकेका हुन् । आधा घन्टापछि यो विवादको हल खोजिएको थियो । उनले इन्ट्री भिसा पाएपछि विमानस्थलबाट बाहिर निस्किए । स्पेनको राहदानीमा विनाभिसा ताइवानमा प्रवेश गर्न सकिन्छ । मेसीले ताइवानलाई चीनकै भूभाग रहेको सम्झेका थिए । यसै कारण उनले भिसाका लागि निवेदन नै दिएनन् ।
यो घटनना १० जुनको हो । सोसल मिडियामा चार दिनअघिको घटना भिडियोसहित सार्वजनिक भएको हो, जुन अहिले भाइरल भइरहेको छ । भिडियोमा मेसीलाई चिनियाँ पुलिसले हिरासतमा लिएजस्तो देखिन्छ । फुटबल करिअरमा मेसी सातौँपटक चीनको यात्रामा छन् ।
