राउटे समुदायको संख्या एक सय ४१ मात्र
लोपोन्मुख राउटे समुदायका ज्येष्ठ मानिएका कर्णबहादुर शाहीको निधन भएको छ । ९४ वर्षीय कर्णबहादुर शाहीको निधन भएको हो । फिरन्ते जीवन बिताउँदै आएका राउटे समुदायहरूले अहिले दैलेखको भैरवी गाउँपालिका– १ दारेघाटमा बसोवास गर्दै आएका छन् ।
दारेघाटमै उनको मृत्यु भएको राउटे परियोजनाका सहजकर्ता लालबहादुर खत्रीले जानकारी दिए । राउटेको आफ्नै संस्कारअनुसार शाहीको शवलाई चिहानमा गाडिएको छ ।
ज्येष्ठ सदस्यको मृत्युपछि राउटे समुदायमा बालबालिका, युवा र वृद्ध गरेर एक सय ४१ जना मात्र रहेका छन् । दैलेख, सुर्खेत, सल्यानलगायतका जिल्लामा धेरैजसो बसोवास गर्ने यो समुदायलाई ०६३ सालदेखि सहजताका लागि सबैलाई सामाजिक सुरक्षा भत्ता वितरण कार्य सुरु गरिएको थियो ।
दैलेखको गुराँस गाउँपालिकाले उनीहरूको बस्ती सरेकै ठाउँमा पुगेर सामाजिक सुरक्षा भत्ता प्रदान गर्दै आएको छ । पछिल्ला दिनहरूमा अत्यधिक मदिरा सेवनका कारण राउटे समुदायहरू एकपछि अर्को गर्दै समस्यामा पर्दै आएका छन् । उनीहरूलाई पुरानै रहनसहनमा छोड्नुपर्ने आवाज उठ्दै आएको छ ।
