तीन दिनमा दोस्रोपटक भेटे ओलीले प्रधानमन्त्री प्रचण्डलाई

नक्कली भुटानी शरणार्थी प्रकरणमा पार्टी सचिव टोपबहादुर रायमाझी मुछिएपछि एमाले अध्यक्ष केपी ओलीले दोस्रोपटक प्रधानमन्त्री पुष्पकमल दाहाल प्रचण्डलाई भेटेर मुद्दामा भइरहेको अनुसन्धानबारे चासो राखेका छन् । यस विषयमा बिहीबार पहिलोपटक प्रधानमन्त्रीलाई ध्यानाकर्षण गराएका ओलीले शनिबार पनि भेटेर चासो राखेका हुन् । 

सांसदसमेत रहेका रायमाझीविरुद्ध प्रहरीले बुधबार पक्राउ पुर्जी जारी गरेको थियो । अर्घाखाँचीमा रहेका रायमाझी ‘काठमाडौं जान्छु’ भनेर हिँडे पनि बिहीबारदेखि ‘भूमिगत’ छन् । उनका छोरा सन्दीपसहितका केहीलाई प्रहरीले पक्राउ गरिसकेको छ । एमाले उपाध्यक्ष एवं पूर्वगृहमन्त्री रामबहादुर थापाको संलग्नताबारे समेत अनुसन्धान भइरहेको बताइएको छ । थापाका सुरक्षा सल्लाहकार डा. इन्द्रजित राई पक्राउ परिसकेका छन् । त्यस्तै, गृह मन्त्रालयकै सहयोगमा भएको ठगी धन्दामा संलग्न सरकारका बहालवाला सचिव टेकनारायण पाण्डे पनि पक्राउ परिसकेका छन् । 

शनिबार भएको करिब दुई घन्टा लामो भेटमा ओलीले अनुसन्धानबारे चासो राखेका थिए । भेटपछि प्रधानमन्त्री प्रचण्डले पत्रकारहरूसँग भने, ‘अस्ति (बिहीबार)को भेटमा पनि उहाँ (ओली)को यही विषय (नक्कली भुटानी शरणार्थी प्रकरण)मा चासो थियो । आज पनि उहाँले यही विषयमा कन्सर्न राख्नुभयो, मैले जनरल कुरा भनेको छु ।’ 

प्रचण्डले दोषी कोही नछुटून् र निर्दोष कोही नपरून् भन्ने मान्यतामा अगाडि बढेको बताएका छन् । ‘प्रक्रिया, पद्धति र ऐनअनुसार दृढताको साथ अगाडि जान्छ । दोषी कोही नछुटून्, निर्दोष कोही नपरून् भन्ने मान्यताबाट बोल्ड्ली अगाडि बढिन्छ,’ उनले भने । 

टोपबहादुर रायमाझी, रामबहादुर थापालाई बचाऔँ भन्ने ओलीको चाहना हो ? भन्ने पत्रकारको प्रश्नमा प्रचण्डले अगाडि भने, ‘त्यस्तो बचाउन भनेर त उहाँले भन्न सक्ने कुरा भएन नि ! प्रधानमन्त्रीसँग कुरा गर्न आउँदा बचाउँ भनेर त कसैले पनि सक्दैन नि ! म दबाबमा पर्दिनँ ।’

भेटपछि ओलीले पनि पत्रकारका प्रश्नमा सटीक जवाफ दिएका छन् । अस्ति पूर्वमन्त्री, उपप्रधानमन्त्री भइसक्या मान्छे हराउँछन् र भन्नुभएको थियो । तर, आज त टोपबहादुर रायमाझी हराउनुभयो । कहाँ हुनुहुन्छ उहाँ ? भन्ने प्रश्नमा ओलीलेको जवाफ थियो, ‘तपाईंहरूले खोज्नूस् न !’ 

ओलीले रायमाझी आफ्नो सम्पर्कमा नभएको दाबी गरे । तपाईं अभियुक्तलाई जोगाउन लागिरहनुभएको भन्ने छ नि भन्ने प्रश्नमा ओलीले भने, ‘तपाईंहरूलाई विश्वास लाग्यो ? केही यस्ता मान्छे छन्, जो एमालेलाई रुचाउँदैनन् । उनीहरूले हल्ला फैलाएका हुन् ।’