राष्ट्रिय फुटबल टोलीका नियमित सदस्य विशाल राई माघको तेस्रो साता अस्ट्रेलिया पुग्दा दुई दशक सँगै खेलेका सुजल श्रेष्ठले निकै भावुक सन्देश लेखेका थिए । सुजलले विशालसँग दुई दशक राष्ट्रिय टोली र क्लबमा बिताएका हरेक क्षण सधैँ स्मरणीय हुने बताएका थिए । युवा तथा सिनियर खेलाडी आफ्नो भविष्य सुनिश्चित बनाउन विदेश पलायन भइरहँदा त्यसको असर फुटबलमा पर्ने सुजलले जनाएका थिए । यसले आफू अन्यन्तै दुःखी भएको उनको भनाइ थियो ।
गत माघको दोस्रो सातामा सोसल मिडियामा प्रतिभावान् खेलाडी विदेश पलायनका दुःख व्यक्त गरेका सुजल स्वयं बिहीबार अस्ट्रेलिया लागेका छन् । सुजलले पनि आफ्नो अति नै मिल्ने साथी विशालकै बाटो पछ्याउँदा सोसल मिडियाबाटै जानकारी दिएका छन् । सुजलले आफ्ना समर्थकलाई अस्ट्रेलिया जानुको बाध्यतासँगै अर्को स्तब्ध निर्णयसमेत लिएका छन् । नेपाली राष्ट्रिय फुटबल टोलीका नियमित खेलाडीसमेत रहेका सुजलले अस्ट्रेलिया जानुअघि अन्तर्राष्ट्रिय खेलबाट सन्न्यासको घोषणा गरेका छन् । एकपटक नेपालको कप्तानी ‘आर्म ब्यान्ड’ लगाएका सुजल बिहीबार राति अस्ट्रेलिया हिँडेका हुन् ।
सुजलले राष्ट्रिय टोलीबाट सन्न्यास लिने
राम्रो समय भएको नयाँ पत्रिकासँग बताएका छन् । ‘मेरा लागि यो सन्न्यास लिने उपयुक्त समय हो, साथै विदेश गएर आफ्नो भविष्य बनाउने पनि यही नै वेला जस्तो लागेको छ,’ नेपालबाट तीन अन्तर्राष्ट्रिय गोल गरेका मिडफिल्डर
सुजलले भने ।
सुजलसँगै अर्का सदस्य रजिन धिमाल पनि अस्ट्रेलिया प्रस्थान गरे । सहिद स्मारक ए डिभिजन लिगमा रजिन, विशाल र सुजल मच्छिन्द्र फुटबल क्लबमा अनुबन्धित थिए । सुजलले अस्ट्रेलियामा बेनी एफसीबाट खेल्ने निर्णय लिएका छन् । बेनी एफसी त्यही क्लब हो, जहाँ नेपाली राष्ट्रिय टोलीका आधा दर्जन खेलाडी छन् । बेनीमा विशालसँगै अभिषेक रिजाल, नितिन थापा, रञ्जन विष्ट, सुमन अर्याललगायत खेलाडी छन् । पछिल्लो समय अस्ट्रेलियामा मात्रै नेपालका तीन दर्जन खेलाडी पुगेका छन् । रोजगारसँगसँगै खेलकुदमा खेलाडीको मोह देखिएको छ ।
भुटानविरुद्ध डेब्यु र पाकिस्तानसँग अन्तिम
सुजलले नेपालका लागि सन् २०११ मार्च १९ मा भुटानविरुद्ध डेब्यु गरेका थिए । पोखरामा भएको खेलमा डेब्यु गरेका सुजलको अन्तिम खेल दशरथ रंगशालामा गत नोभेम्बरमा पाकिस्तानविरुद्ध रह्यो । आफ्नो अन्तिम खेलमा उनले ४५ मिनेट मैदानमा बिताए । सन् २०१९ मन्डालामा म्यानमारविरुद्ध कप्तानी आर्म ब्यान्ड लगाएका सुजलले टिमोर लिस्टे, मकाउ र अफ्रिकन प्रतिद्वन्द्वी मोरिससविरुद्ध एक–एक गोल गरेका छन् ।
सुजलले युवा खेलाडीको आगमनबढ्दो भएकाले आफ्नो सन्न्यास लिने समय आएको बताए । ‘फुटबलमा युवा खेलाडीको आगमन बढ्दो छ । उनीहरूलाई अवसरदिनुपर्छ जस्तो पनि लाग्छ,’ सुजल भन्छन् । सुजलको कप्तानीमा नेपालले सन् २०१९ मा नेपालमै आयोजना भएको १३औँ दक्षिण एसियाली खेलकुद (साग)मा फुटबलतर्फ स्वर्ण पदक जितेको थियो । खेलाडी रहँदा उनले एएफसी सोलिडारिटी र गत चैतमा दशरथ रंगशालामा भएको थ्री नेसन्स कपको उपाधि जितेका छन् ।
चार लिग उपाधि
घरेलु फुटबलमा सुजल निकै सफलखेलाडी हुन् । सुजलले सहिद स्मारक ए डिभिजन लिगमा सर्वाधिक आठपटक च्याम्पियन मनाङ मस्र्याङ्दी र दुईपटकको च्याम्पियन मच्छिन्द्रबाट खेले । सुजलले एन्फा एकेडेमीपछि सीधै मनाङजस्तो चर्चित क्लबबाट खेल्ने अवसर पाए ।
मनाङमा उनले एक दशक बताए । विशाल र सुजलले नौ वर्ष मनाङबाट खेले । मनाङले ०७५ सालमा भएको विनारेलिगेसन लिगमा कीर्तिमानी आठौँपटक जित्दा र ०७० को लिग जित्दा सुजल र विशाल मुख्य खेलाडी थिए । ०७६ मा दुवै खेलाडी मनाङसँगको लामो यात्रा टुंग्याउँदै मच्छिन्द्र क्लबसँग आबद्ध भए ।
यी दुवै खेलाडीले मच्छिन्द्रलाई ०७६ र ०७८ सालमा लगातार दुईपटक ए डिभिजन लिगको उपाधि दिलाए । ‘अस्ट्रेलियामा कति बस्छु, कति खेल्छु, थाहा छैन । मन लागे त्यतै बस्छु,’ सुजलले भने, ‘त्यहाँको वातावरण मिलेन भने नेपाल फर्केर घरेलु फुटबल खेल्छु ।’
पालो नयाँ पुस्ताको : सुजल
११ वर्ष, ५१ खेल आफ्नो देश नेपालको झन्डा छातीमा बोकेर मैदानमा उत्रने अवसर पाउँदा निकै गर्विलो महसुस गरेको छु । केही खुसी, केही दुःख, कतै उपाधि, कही निराश क्षणजस्ता यी सबै तितामिठा सम्झना मनमा रहनेछन् । आज म राष्ट्रिय टोलीबाट आफ्नो सन्न्यास घोषणा गर्दछु । यति लामो समयसम्म राष्ट्रिय टोलीको जर्सी लगाउन पाउनु मेरा लागि ठूलो सम्मान थियो ।
हाल राष्ट्रिय टोलीका र अन्य भाइहरू धेरै क्षमतावान् छन्, अब पालो नयाँ पुस्ताको हो । मलाई विश्वास गर्दै नियमित राष्ट्रिय टोलीमा स्थान दिँदै यहाँसम्म मद्दत गर्नुहुने सम्पूर्ण प्रशिक्षकहरूलाई पनि हृदयदेखि नै धन्यवाद छ । मलाई लाग्छ, अन्तर्राष्ट्रिय फुटबलबाट सन्न्यास लिने यो मेरा लागि उपयुक्त समय हो ।
