ताप्लेजुङमा रहेको प्रसिद्ध तीर्थस्थल पाथीभरामा दर्शन गर्न आएकी एक महिलाको मृत्यु भएको छ । पाथीभरा मन्दिरको दर्शन गरी सोमबार बेलुका माथिल्लो फेदीमा वास बसेकी बिर्तामोड नगरपालिका– २ चारपाने झापा बस्ने ४७ वर्षीया शिवमाया गौतमको मृत्यु भएको जिल्ला प्रहरी कार्यालयका सूचना अधिकारी प्रहरी निरीक्षक कुशराम कार्कीले बताए ।
प्रहरी निरीक्षक कार्कीका अनुसार सोमबार पाथीभराको दर्शन गरी पुनः माथिल्लो फेदीमा आई गौतमलगायत आफन्त वास बसेका थिए । बहिनी र अन्य आफन्तका साथ आएकी गौतम मंगलबार राति २ बजेतिर शौचालय गएकी र निकैबेर शौचालयबाट नफर्किएपछि हेर्दा शौचालयमा नै लडेको अवस्थामा भेटिएकी थिइन् ।
तत्काल स्थानीय स्वास्थ्यकर्मी बोलाएर चेकजाँच गर्न खोज्दा उनी मृत भइसकेकी थिइन् । मृत गौतमको शवलाई जिल्ला अस्पतालमा ल्याउने र पोस्टमार्टमपछि आफन्तको जिम्मा लगाइने प्रहरीले जनाएको छ ।
