लमजुङको दोर्दी खोलामा निर्माण सम्पन्न ५४ मेगावाटको सुपरदोर्दी ‘ख’ जलविद्युत् आयोजनाको विद्युत् राष्ट्रिय ग्रिडमा थपिने भएको छ । पिपुल्स हाइड्रोपावर कम्पनीले निर्माण आयोजनाको बाँध, विद्युत्गृह, सुरुङमार्ग सबै क्षेत्रको काम पूरा गरी उपकरण जडानसमेत सम्पन्न गरेर आन्तरिक परीक्षण गरेको कम्पनीले जनाएको छ ।
आयोजनाबाट फागुन मसान्तदेखि उत्पादन परीक्षण र चैतदेखि व्यावसायिक उत्पादन गर्ने लक्ष्य रहेको कम्पनीले जनाएको छ । पछिल्लो तालिकाअनुसार ०७९ फागुनभित्र उत्पादन सुरु गर्ने लक्ष्य छ । आयोजना सम्पन्न भएपछि उत्पादन हुने विद्युत् दोर्दी करिडोर प्रसारण लाइनको कीर्तिपुर सबस्टेसनमा जोडिने आयोजनाका निर्देशक अर्जुन गौतमले बताए ।
आयोजना सम्पन्न गर्न आठ अर्ब ८० करोड लागत अनुमान गरिए पनि निर्माण अवधि लम्बिँदा खर्च बढ्ने देखिएको छ । आयोजनामा सानिमा बैंकको अगुवाइमा सातवटा बैंकले पाँच अर्ब ८० करोड रुपैयाँ ऋण लगानी गरेका छन् ।
