एकीकृत समाजवादीकी नेतृ रामकुमारी झाँक्रीले पछिल्लो दुई वर्षमा आफू सबैभन्दा बढी साइबर हमलामा परेको बताएकी छिन् । उनले मंगलबार बिहान सामाजिक सञ्जाल फेसबुकमार्फत आफू सबैभन्दा धेरै साइबर हमलामा परेकाले कानुनी उपचार खोज्न बाध्य भएको जनाएकी छिन् ।
अनुसन्धान टिमले साइबर आक्रमण, साइबर हिंसा र साइबर ह्यारेसमेन्टको सम्बन्धमा झाँक्रीमाथि लामो समय लगाएर अनुसन्धान गरेको थियो । अनुसन्धानपछि अनुसन्धान टिमले आफूमाथि सबैभन्दा धेरै साइबर हमला भएको बताएको उल्लेख गरेकी छिन् ।
उनीमाथि सबै प्रकारका पेसा, वर्ग, जातजाति, लिंग र सबै क्षेत्रमा बस्ने व्यक्तिहरूले व्यक्तिगत रूपमा अपशब्द प्रयोग गरेर गालीगलाेज गरेको अनुसन्धानमा देखिएको छ । आफूलाई सोसल मिडियामा सबैभन्दा धेरै जातीय हिसाबले मगर, तामाङ, राई, लिम्बूजस्ता जनजाति समुदायका व्यक्तिले आक्रमण गरेको उनको दाबी छ । त्यस्तै विश्वकर्मा, परियार, नेपालीजस्ता दलित समुदायका व्यक्तिहरूसमेत आफूलाई आक्रमण गर्न लागेको उनको भनाइ छ ।
त्यसैगरी लैंगिक हिसाबले महिलाहरू, महिलाका नाम र महिलाको प्रोफाइल फोटो राखेका नक्कली आइडीबाट आफू आक्रमणमा परेको उनले उल्लेख गरेकी छिन् ।
आफ्नो काम र आफूसँग असम्बन्धित व्यक्तिहरू पनि ठूलो संख्यामा व्यक्तिगत गालीगलाेजमा आएको उनको दाबी छ । आफूले अब पनि कानुनी उपचार नखोज्ने हो भने आफूभन्दा पछाडिका बहिनी र छोरीहरूमा यस्तोखाले सिकार झन् बढ्ने भन्दै चाँडोभन्दा चाँडो कानुनी उपचार खोज्ने उनले बताइन् ।
