अमेरिका जाने सपना साँचेर रुकुम पश्चिम आठबिसकोट नगरपालिका– १० भयाउनेका २० वर्षीय मदन शाही गत १८ फागुनमा घरबाट निस्किए । उनले हिँड्न खोजेको बाटो ‘अवैध’ थियो, लैजान्छु भन्ने पनि अवैध थिए । उनको त्यो अवैध यात्रा पानामाको जंगलमा पुगेर टुंगियो ।
गत २५ मंसिरमा पानामाको जंगलमा खोला तर्ने क्रममा डोरी चुँडिएपछि मदन खोलामा बगे । मदन मात्र बगेनन्, उनी र उनीसँग जोडिएको परिवारका सपना पनि बगे । मदनको मृत्यु भएको लामो समयसम्म परिवारले चाल पाएको थिएन । अमेरिका पुगेर छोरोले फोन गर्ला भनेर कुरेर बसेका आमाबुबा बिहीबार मर्माहत हुन पुगे, जब मदनको मृत्युको खबर घरमा पुग्यो ।
मदनका साइँला दाइ कपिलका अनुसार ११ डिसेम्बरमा मृत्यु भएको खबर बिहीबार आइपुग्यो । मदनसँगै गएका अन्य नेपाली ब्राजिलमा पक्राउ परेपछि नेपाल फर्काइएका थिए । तर, मदन अन्य केही विदेशीसँग अगाडि बढे । तर, गन्तव्यमा पुग्नुअघि नै विश्राम लिन बाध्य भए । मृत्युको खबरले बाबुआमा विक्षिप्त बनेका छन् । ‘कैयौँ सपना बनेर भाइ अमेरिका हिँडेको थियो,’ कपिलले भने, ‘भाइसँगै ती सपना त मरे मरे, हाम्रो खुसी पनि निभेर गयो ।’
कपिलले दिएको जानकारीअनुसार अमेरिका पठाउने प्रयोजनका लागि ४० लाख रुपैयाँ खर्च भइसकेको छ । एकातिर परिवारको सदस्य गुमेको चोट छ, अर्कोतिर थपिएको आर्थिक भार । मदनको शव नेपाल ल्याउन पहल गर्न मदनका जेठा दाइ हर्कु काठमाडौं गएका छन् । मदन कुन माध्यमबाट त्यहाँसम्म पुगेका हुन् भनेर परिवारका सदस्यले केही बताएका छैनन् । प्लस टुसम्मको पढाइ सकेका मदन गाउँमा कुनै सम्भावना नदेखेपछि अमेरिकाको यात्रामा निस्किएको परिवारका सदस्यको भनाइ छ ।
क्यारेबियन सागरमा बेपत्ता छन् दुई रुकुमेली
लाखौँ पैसा तिरेर ज्यानको बाजी लगाएर अवैध बाटो हुँदै अमेरिकाको यात्रामा निस्कनेमा रुकुमका धेरै छन् । यहाँका प्रत्येक घरबाट अमेरिका जाने प्रयास हुने गरेको छ । प्रतिव्यक्ति ६०–६५ लाखसम्म खर्च गरेर अमेरिका निस्कनेको लर्को छ । यस्तो जमातमा युवादेखि ५० कटेका सम्म छन् ।
धेरैजना अमेरिका पुगिसकेका पनि छन् । त्यसले अरूलाई जोखिम मोल्न आकर्षित गरेको छ । अवैध बाटोबाट अमेरिका जानेको संख्या मात्र बढेको छैन, बाटोमै ज्यान गुमाउनेको संख्या पनि बढ्दो छ । अवैध रूपमा अमेरिका निस्किएका यहाँका दुईसहित तीन नेपाली गत २५ कात्तिकदेखि क्यारेबियन सागरमा बेपत्ता छन् ।
कोलम्बियाबाट ब्राजिल छिर्ने क्रममा डुंगा पल्टिँदा रुकुम पश्चिमको मुसिकोट नगरपालिका– ५ का ४० वर्षीय रमेश गौतम, बाँफीकोट गाउँपालिका– ७ का २५ वर्षीय प्रदीप खत्री र प्युठानका काले गिरी बेपत्ता भएका हुन् । अब उनीहरूका परिवारले माया मार्न थालेको छ । रमेशकी श्रीमती लीला बोहरा फर्किनुहुन्छ कि भन्ने आस मर्दै गएको बताउँछिन् ।
बुढा बाआमा, श्रीमती, आठ वर्षका छोरा र १२ वर्षकी छोरीलाई घरमा छाडेर रमेश अमेरिका हानिएका थिए । १८ वर्ष नेपाली सेनामा सेवा गरेपछि स्वैच्छिक अवकाश लिएका रमेशले तीन वर्षजति मुसिकोटमै काम गरे । तर, सबै छरछिमेकी अमेरिका पुग्न थालेपछि उनलाई पनि अमेरिकाको भूत चढ्यो । घरका परिवारलाई मनाएर उनी दुबई हुँदै अमेरिकातिर लागेका थिए ।
