काभ्रेको बेथानचोक–४ चलाल गणेशस्थानमा भएको बस दुर्घटनामा मृत्यु हुनेको संख्या ११ पुगेको छ । मृत्यु हुनेको संख्या अझै बढ्न सक्ने अनुमान गरिएको छ ।
२० भन्दा बढी घाइते छन् । घाइतेमध्ये केहीको अवस्था गम्भीर छ । मृत्यु भएकामध्ये नौवटा शव धुलिखेल अस्पतालमा र दुईजनाको शव शिर मेमोरियल अस्पतालमा ल्याइएको जिल्ला प्रहरी कार्यालय काभ्रेका डिएसपी ढुण्डीराज न्यौपानेले जानकारी दिए ।
शिर मेमोरियलमा १२ जनाको उपचार भइरहेको छ । तीमध्ये तीनजनाको अवस्था गम्भीर छ । मृत्यु भएकाहरूको पहिचान खुल्न बाँकी रहेको छ ।
दुईवटा डोजरको सहायतामा मृत्यु भएकाहरूको शव बसभित्रबाट निकालेर अस्पताल पठाइएको स्थानीयले जनाएका छन् ।
बेथानचोक– ५ बाट बनेपा पनौतीतर्फ आउँदै गरेको बा. ३ख ४३८५ नम्बरको बस आज साँझ सवा ६ बजे भित्तामा ठोक्किएपछि सडकबाट खसेर दुर्घटना भएको हो ।
बसमा भान्जाको व्रतबन्धमा गएर फर्किएका बनेपा ११ सल्लेका यात्रु चढेको बताइएको छ । रिजर्भ गरिएको बसमा कति यात्रु थिए भन्ने खुलेको छैन ।
