- वि.सं २o७९ मङ्सिर २७ मंगलबार
काभ्रेको बेथानचोक–४ चलाल गणेशस्थानमा बस दुर्घटना हुँदा कम्तीमा दुईजनाको मृत्यु भएको छ । घटनामा अरू केही यात्रुको मृत्यु भएको स्थानीयले बताएका छन् । तर, प्रहरीले पुष्टि गरिसकेको छैन ।
दुर्घटनापछि उपचारका लागि शिर मेमोरियल अस्पताल ल्याएका १४ मध्ये उपचारको क्रममा दुईजनाको ज्यान गएको हो । उनीहरूको पहिचान खुलेको छैन । बाँकी १२ मध्ये तीनजनाको अवस्था गम्भीर रहेको अस्पतालले जनाएको छ ।
बेथानचोक– ५ बाट बनेपातर्फ आउँदै गरेको बा. ३ख ४३८५ नम्बरको बस भित्तामा ठोक्किएपछि सडकबाट खसेर दुर्घटनाग्रस्त भएको प्रहरीले जनाएको छ ।
बसमा भान्जाको व्रतबन्धमा गएर फर्किएका बनेपा ११ सल्लेका यात्रु चढेको बताइएको छ । रिजर्भ गरिएको बसमा कति यात्रु थिए भन्ने खुलेको छैन ।
