आगामी पाँच वर्षका लागि भएको प्रतिनिधिसभा र प्रदेश सभाको प्रत्यक्ष र समानुपातिक निर्वाचनको अन्तिम परिणाम आइसकेको छ । देशैभरका निर्वाचन परिणाम हेर्दा दोहोरिएर सांसद बन्न चाहेका थुप्रै उम्मेदवार पराजित भएका छन् । विजयी भएकाहरूले प्राप्त गरेको मत हेर्दा अघिल्लोपटक भन्दा मतान्तर घटेको देखिन्छ । अर्थात्, दोहोरिएर सदनसम्म पुग्न चाहनेहरूप्रति जनताको रुचि कम रहेको देखिएको छ ।
यस्तै दृश्य, मधेस प्रदेश सभामा पनि देखिएको छ । सप्तरी, सिराहा, धनुषा, महोत्तरी, सर्लाही, रौतहट, बारा र पर्सा गरी आठ जिल्लाबाट ६४ सांसद प्रत्यक्ष निर्वाचित भई मधेस प्रदेशमा पुगेका छन् । यी ६४ मध्ये २७ जना दोहोरिएका हुन् ।
दोहोरिएर सांसद भएकामा बहालवाला सरकारका मुख्यमन्त्री लालबाबु राउत, सभामुख सरोज यादव, गृह तथा सञ्चारमन्त्री भरतप्रसाद साह, कानुन न्याय तथा प्रदेश सभा मामिलामन्त्री प्रमोदकुमार यादव छन् । यस्तै, पूर्वमन्त्रीहरू जितेन्द्र सोनल, रामसरोज यादव, वीरेन्द्रप्रसाद सिंह, पूर्वराज्यमन्त्री अभिराम शर्मा पनि पुनः सांसद बनेका छन् ।
जित हासिल गरे पनि यीमध्ये धेरैजसोको लोकप्रियता आफ्नो निर्वाचन क्षेत्रमा खस्किएको देखिन्छ । किनभने, दोहोरिएका २७ मध्ये मुख्यमन्त्री राउतसहित १६ जनाले ०७४ मा भएको निर्वाचनमा भन्दा कम मत पाएका छन् ।
मुख्यमन्त्रीदेखि पूर्वमन्त्रीको घट्यो लोकप्रियता
यसपटक पनि पर्सा १ को प्रदेश सभा २ बाट निर्वाचित भएका मुख्यमन्त्री राउतले ०७४ माभन्दा मत घटाएका छन् । पाँच वर्षअघि उनले कांग्रेसका विजयकुमार सर्राफलाई दुई हजार ४४ मतान्तरले पराजित गरेका थिए । सोही क्षेत्रबाट यसपटक पनि निर्वाचित भएका राउतले कांग्रेसका रामनारायणप्रसाद कुर्मीलाई एक हजार ३३३ मतले मात्र पराजित गरे ।
बारा क्षेत्र नम्बर १ (२) बाट निर्वाचित मधेस प्रदेशका सभामुख सरोज यादवको पनि लोकप्रियता घटेको देखिन्छ । सोही क्षेत्रबाट ०७४ मा निर्वाचित हुँदा यादवले १४ हजार २६९ मत प्राप्त गरी कांग्रेसका भागवतप्रसाद साहलाई ६ हजार १४३ मतान्तरले पराजित गरेका थिए । यसपटक भने उनले कांग्रेसका नागेन्द्रप्रसाद कानुलाई पराजित गरे पनि मतान्तर चार हजार ८८७ मतको मात्र रह्यो ।
सिराहा क्षेत्र नम्बर ३(२) बाट निर्वाचित मधेस प्रदेशका कानुन, न्याय तथा प्रदेश सभा मामिलामन्त्री प्रमोदकुमार यादवको लोकप्रियता पनि खस्किएको छ । ०७४ मा उनले कांग्रेस उम्मेदवार सुभाषचन्द्र यादवलाई दुई हजार ४६८ मतान्तरले पराजित गरेका थिए । यसपटक उनले कांग्रेसकै उम्मेदवार संजयप्रकाश यादवलाई एक हजार ९६२ मतान्तरले विजयी भए ।
पूर्वमन्त्रीहरूको लोकप्रियता पनि खस्कियो
पुनः दोहोरिएका मधेस प्रदेशका पूर्वमन्त्रीहरू जितेन्द्र सोनल, वीरेन्द्रप्रसाद सिंह, अभिराम शर्माको लोकप्रियता पनि कम हुँदै गएको देखिन्छ । लोसपाका नेता पूर्वमन्त्री जितेन्द्र सोनल बारा क्षेत्र नम्बर ४(२) बाट दोहोरिएर निर्वाचित भएका छन् ।
०७४ मा सात हजार ४२६ मतान्तरले माओवादीका उमेशकुमार कुशवाहालाई हराएका सोनलले यसपटक जसपाका आत्मरामप्रसाद साहलाई पाँच हजार ३४३ मतान्तरले पराजित गरे । यस्तै, मधेस प्रदेशका युवा तथा खेलकुद पूर्वमन्त्री कांग्रेसका वीरेन्द्रप्रसाद सिंहले एमालेका रामबाबु रायलाई एक हजार ७७ मतान्तरले पराजित गरे । तर, ०७४ मा उनले निकटतम प्रतिस्पर्धी माओवादीका फकिर महतोलाई तीन हजार ८८९ मतान्तरले हराएका थिए ।
महोत्तरी ३(१) बाट लोसपाका नेता पूर्वराज्यमन्त्री अभिराम शर्माको पनि लोकप्रियता खस्किएको छ । ०७४ मा शर्मा ३६०४ मतान्तरले विजयी भएका थिए । यसपटक उनले मधेस प्रदेशका पूर्वमहान्यायाधिवक्ता जसपाका दीपेन्द्र झालाई तीन हजार ४३० मतान्तरले हराए ।
मधेस प्रदेशमा दोहोरिएका २७ जनामध्ये १७ जनाको लोकप्रियता खस्किएको देखिन्छ । जसमा धनुषा १ (२) बाट माओवादी केन्द्रका रामचन्द्र मण्डल, धनुषा २ (२) बाट जसपाका रामअशिष यादव, महोत्तरी १ (१) एमालेकी शारदादेवी थापा, महोत्तरी २ (१) बाट लोसपाका जयनुल राईन, महोत्तरी २ (२) स्वतन्त्रबाट सुरिताकुमारी साह, महोत्तरी ३ (२) लोसपाकी रानीकुमारी तिवारी, महोत्तरी ४ (२) बाट जसपाका सरोजकुमार सिंह पहिलेभन्दा कम मतान्तरसहित निर्वाचित भएका छन् ।
यस्तै, सर्लाही १ (१) बाट लोसपाका उपेन्द्र महतो, बारा २ (१) स्वतन्त्रबाट शारदाशंकरप्रसाद कलवार, बारा २ (२) बाट लोसपाका बच्चा राउत अहिर र पर्सा ४ (२) बाट जसपाका सिंगासन कलवारको लोकप्रियता खस्किएको छ ।
बहालवाला तीन मन्त्री पराजित
मधेस प्रदेशका बहालवाला तीनजना मन्त्री पराजित भएका छन् । जसपाबाट मुख्यमन्त्रीका दाबेदार रहेका अर्थमन्त्री शैलेन्द्रप्रसाद साह सप्तरी क्षेत्र नम्बर २ (१) बाट पराजित भए । अर्थमन्त्री साह जनमत पार्टीका सतिशकुमार सिंहसँग आठ हजार ४४२ मतान्तरले पराजित भए । साहले आठ हजार २९२ मत ल्याउँदा विजयी सिंहले १६ हजार ७३४ मत पाए ।
जसपाबाट मुख्यमन्त्रीका अर्का दाबेदार मानिएका भूमि व्यवस्था, कृषि तथा सहकारी मन्त्री विजयकुमार यादव पनि ६ सय ४४ मतान्तरले जनमत पार्टीका संजयकुमार यादवसँग पराजित भए । मन्त्री यादवले ११ हजार ५२७ मत पाए भने जनमत पार्टीका संजयले १२ हजार १७१ मत पाए ।
मधेस प्रदेशका उद्योग, पर्यटन तथा वनमन्त्री शत्रुधन महतो एक हजार ३४२ मतान्तरले एमालेका हरिनारायण महतोसँग पराजित भए । मन्त्री महतोले १५ हजार ९६० मत पाए भने एमालेका महतोले १७ हजार ३०२ मत पाए ।
जानकार भन्छन् – मतदाताले कामको मूल्यांकन गरेका हुन्
सत्तागठबन्धन र प्रतिपक्ष गठबन्धन भए पनि दोहोरिएका २७ जनामध्ये १६ जनाले ०७४ को निर्वाचनभन्दा कम मत पाउनु खस्किँदो लोकप्रियताको संकेत भएको जानकारहरू बताउँछन् ।
मधेस मामिलाका जानकार डा. सोहन साह पाँच वर्षको अवधिमा लोकप्रिय काम गर्न नसक्नु र लाभमै केन्द्रित हुनुले मुख्यमन्त्रीदेखि मन्त्रीहरूको मत घटेको बताउँछन् ।
