- वि.सं २o७९ कार्तिक २३ बुधबार
बैंकको चर्को ब्याजदर असुल्न थालेको विरोधमा बुधबार विराटनगरमा उद्योगी–व्यापारीहरूले मौन विरोध जुलुस प्रदर्शन गरेका छन्। बैंकहरूले असुली रहेको दोहोरो अंकको ब्याजदर अझै घटाउन नमानेको भन्दै बुधबार विराटनगरमा उद्योगी–व्यापारीले कालो पोसाक लगाएर कालो ब्यानरसहित बृहत् मौन जुलुस प्रदर्शन गरेका हुन्।
मोरङ व्यापार संघको परिसरमा प्रदर्शन गरिएको मौन विरोध जुलुसमा उद्योग संगठन मोरङ, नेपाल उद्योग परिसंघ प्रदेश १ समिति र मोरङ व्यापार संघमा आबद्ध पदाधिकारीसहित उद्योगी व्यापारीहरू सहभागी भएका थिए।
निजी क्षेत्रका वाणिज्य बैंकहरूले दोहोरो अंकको मनमौजी रूपले असुल्न थालेको चर्को ब्याजदर एक अंकमा नझारेसम्म आन्दोलनलाई अझै कडा बनाउँदै लैजाने मोरङ व्यापार संघका अध्यक्ष नवीन रिजालले बताए। बैंकहरूले चर्को ब्याज असुलेको भन्दै मंगलबार नेपाल उद्योग वाणिज्य संघ प्रदेश १ समितिले पनि सरकार, राष्ट्र बैंक र वाणिज्य बैंकलाई ज्ञापनपत्र बुझाएको थियो।
