मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० चैत १५ बिहीबार
  • Thursday, 28 March, 2024
एजेन्सी
२०७९ असोज २९ शनिबार ०७:५२:००
Read Time : < 1 मिनेट
विश्व प्रिन्ट संस्करण

‘पछिल्लो ५० वर्षमा विश्वभर वन्यजन्तुको संख्या ६९ प्रतिशतले घट्यो’

Read Time : < 1 मिनेट
एजेन्सी
२०७९ असोज २९ शनिबार ०७:५२:००

विश्वको वन्यजन्तुको संख्या सन् १९७० देखि सन् २०१८ बीचमा झन्डै ६९ प्रतिशतले घटेको विश्व वन्यजन्तु कोषको पछिल्लो रिपोर्टले देखाएको छ । बिहीबार सार्वजनिक रिपोर्टले जलवायु परिवर्तन र अन्य मानवीय क्रियाकलापको प्रभावले जीवजन्तुको संख्यामा यति ठूलो ह्रास आएको स्पष्ट भनेको छ । 

पछिल्लो रिपोर्ट डब्लुडब्लुएफले सन् १९७० देखि २०१८ बीच विश्वभरका ५,२३० मेरुदण्ड भएको प्रजातिको करिब ३२,००० वासस्थानको अध्ययनपछि प्रकाशित गरेको हो । अध्ययनका लागि कोषले लिभिङ प्लानेट इन्डेक्स (एलपिआई) नामक तथ्यांक–समूह प्रयोग गरेको थियो । ८९ लेखकद्वारा तयार पारिएको रिपोर्टमा पृथ्वीले जलवायु परिवर्तन र जैविक विविधता विनाशको ‘दोहोरो संकट’ सामना गरिरहेको भनी प्रकाश पारेको छ । 

डब्लुडब्लुएफको रिपोर्टअनुसार हाल विश्वका एक प्रतिशतदेखि २.५ प्रतिशत स्तनधारी, सरिसृप्त माछा र उभयरचर लोप भइसकेको छ भने झन्डै १० लाख जीवजन्तु र वनस्पति लोप हुने अवस्थामा छन् । विश्वका क्षेत्रीय इकालामध्ये ल्याटिन अमेरिका र क्यारिबियन क्षेत्रमा औसतमा सबैभन्दा धेरै अर्थात् ९४ प्रतिशत जीवजन्तुको संख्या घटेको रिपोर्टमा उल्लेख छ । रिपोर्टले यस भेगमा अवस्थित अमेजन रेनफरेस्ट(वर्षावन) निष्प्रभावी पुग्ने स्थितिमा पुग्नेसमेत चेतावनी दिएको छ । 

यस अवधिमा केही जीवजन्तुको संख्या उलेख्य मात्रामा घटेको र केहीको तुलनात्मक रूपमा वृद्धि भएको कोषले बताएको छ । संरक्षण प्रयासका कारण बाघ, हात्तीजस्ता चर्चित जीवको संख्यामा केही वृद्धि भएको छ । कम परिचित जीवको संख्यामा सबैभन्दा बढी ह्रास देखिएको डब्लुडब्लुएफका अन्तर्राष्ट्रिय महानिर्देशक मार्को ल्यामबर्टिनीले बताए ।