संघीय राजधानी रहेको काठमाडौं उपत्यकाभित्रै डेँगु फैलिएको पाइएको छ । ललितपुरमा पछिल्लो एक महिनायता ५३ जनामा डेँगु संक्रमण पुष्टि भएको हो ।
ललितपुर महानगरपालिका र महालक्ष्मी नगरपालिकामा डेँगु फैलिएको अधिकारीहरूले जनाएका छन् । आगामी दिनमा संक्रमितको संख्या बढ्न सक्ने चिन्ता उनीहरूको छ ।
१५ असारयताको तथ्यांकअनुसार संक्रमितमध्ये ४५ जना ललितपुर महानगर र अन्य आठजना महालक्ष्मी नगरका हुन् । ललितपुर महानगरपालिकाको मानभवन, सानेपा, बागडोल, थसिखेल, महालक्ष्मीस्थान, पाटन, कुमारीपाटी, तिखेदेवल र महालक्ष्मी नगरपालिकाको इमाडोल र लुभु क्षेत्रमा डेँगु भेटिएको छ । यीमध्ये महानगरको वडा नम्बर ५ र १४ मा पर्ने थसिखेल र महालक्ष्मीस्थानमा मात्रै ३५ जना डेँगुका बिरामी भेटिएका छन् ।