नयाँ पार्टी बनाएपछि डा. भट्टराई सत्तागठबन्धन वा विपक्षी गठबन्धनमा सहभागी हुन्छन् भन्नेमा चासो
प्रधानमन्त्री शेरबहादुर देउवाले सोमबार मन्त्रिमण्डल हेरफेर गर्दै तीन नयाँ पात्र भित्र्याए । भौतिक पूर्वाधारमन्त्री रेणु यादव, वनमन्त्री रामसहाय यादव र कृषिमन्त्री महेन्द्रराय यादवलाई फिर्ता बोलाएस“गै मृगेन्द्रकुमार सिंह कृषि तथा पशुपक्षी विकास, मोहम्मद इस्तियाक रार्ई भौतिक पूर्वाधार तथा यातायात र प्रदीप यादव वन तथा वातावरणमन्त्री भएका छन् ।
जसपा अध्यक्ष उपेन्द्र यादवले आइतबार राति मन्त्री हेरफेरको सूची प्रधानमन्त्रीलाई बुझाएका थिए । सोहीअनुसार प्रधानमन्त्री देउवाले सोमबार बिहान नियुक्त गरे र लगत्तै नवनियुक्त तीन मन्त्रीले पद तथा गोपनीयताको शपथ लिए । अध्यक्ष यादवले संघीय मामिला तथा सामान्य प्रशासनमन्त्री राजेन्द्र श्रेष्ठलाई भने निरन्तरता दिने गरी निर्णय लिएका थिए ।
जसपामा विवाद रहेको र एकल निर्णयका आधारमा मन्त्री हेरफेर नगर्न पार्टीका संघीय अध्यक्ष डा. बाबुराम भट्टराईले गरेको आग्रह अस्वीकार गर्दै प्रधानमन्त्री देउवाले गरेको मन्त्री हेरफेर सम्भवतः जसपा विभाजनको अन्तिम कडी हु“दै छ । अध्यक्ष यादव र संघीय अध्यक्ष डा. भट्टराई आगामी मार्गचित्र कोर्न पार्टीको केन्द्रीय समिति बैठकको तयारीमा लागेका छन् ।
समानान्तर रूपमा बोलाइएका अलग–अलग बैठकले आ–आफ्नो बाटो तय गर्ने जसपाकै नेताहरू बताउ“छन् । अध्यक्ष यादवले पार्टीमा छलफल नै नगरी एकलौटी निर्णयका आधारमा मन्त्री हेरफेरको निर्णय गरेको भन्दै डा. भट्टराई पक्षले आगामी २९ र ३० असारमा केन्द्रीय समितिको विस्तारित बैठक बोलाएको छ ।
आगामी रणनीतिबारे छलफल गर्न काठमाडौंमा बैठक बोलाइएको डा. भट्टराईनिकट नेता गंगानारायण श्रेष्ठले नयाँ पत्रिकालाई जानकारी दिए । ‘उपेन्द्रजीले पार्टीमा छलफल नै नगरी मन्त्री हेरफेरको निर्णय लिनुभयो । त्यो निर्णय हामीलाई मान्य छैन । विस्तृत छलफलका लागि २९ र ३० असारमा केन्द्रीय समितिको विस्तारित बैठक बोलाएका छौँ’ उनले भने । स्थानीय निर्वाचनपूर्व नै निर्वाचन आयोगमा यसअघि हिसिला यमीले पार्टी दर्ता गराएकी छिन् । त्यसैलाई निरन्तरता दिने विषयमा पनि छलफल भइरहेको एक नेताले बताए ।
उता यादव पक्षले २७ र २८ असारमा वीरगन्जमा बस्ने गरी केन्द्रीय समिति बैठक बोलाइसकेको छ । उक्त बैठकमा भट्टराई पक्षले सहभागी नहुने स्पष्ट पारिसकेको छ । विस्तारित बैठकमा कुन तहसम्मका नेतालाई सहभागी गराउने भन्ने निर्णय भइनसकेको श्रेष्ठले जानकारी दिए । प्रदेश र जिल्ला नेतृत्वलाई सहभागी गराउने तयारी रहेको स्रोतले बताएको छ । समानान्तर बैठक नयाँ पार्टीको अभ्यास भएको एक नेताले बताए । उनका अनुसार विस्तारित बैठकपछि दल दर्ताका लागि आयोग जाने तयारी छ । आफूहरूस“ग ६ सांसद र ४० प्रतिशत केन्द्रीय सदस्य रहेको डा. भट्टराई समूहको दाबी छ ।
जसपाका सचेतक प्रमोद साहले अझै पनि मिलेरै जान प्रयास गर्नुपर्ने बताए । ‘निर्वाचनको मुखमा फुट्ने राम्रो होइन । निर्णय गलत भयो भने बसेर छलफलको माध्यमबाट सच्याउन सकिन्छ । कतिपय विषयमा हाम्रा पनि असन्तुष्टि छन्’, यादवनिकट साहले भने । असन्तुष्टिलाई बैठकमा राखेर अगाडि बढ्नुपर्र्ने र पार्टी विभाजनको पक्षमा कोही पनि लाग्न नहुनेमा उनले जोड दिए ।
एकीकृत समाजवादीका मन्त्री हेरफेरमा पनि पार्टीभित्र विवाद भएको थियो । पार्टी अध्यक्ष माधव नेपालले सिफारिस गरेका व्यक्तिलाई प्रधानमन्त्री देउवाले तीन सातापछि मन्त्रीमा नियुक्त गरेका थिए ।
