मुख्य समाचार डिजिटल संस्करण

दोर्दी खोलाको २७ मेगावाट विद्युत् प्रसारण लाइन अभावले राष्ट्रिय ग्रिडमा जोडिएन

लमजुङको दोर्दी खोलामा निर्माण सम्पन्न भएको २७ मेगावाटको दोर्दी खोला जलविद्युत् आयोजनाको विद्युत् प्रसारण लाइन अभावले राष्ट्रिय प्रणालीमा जोडिन सकेको छैन । नेपाल विद्युत् प्राधिकरणले उदीपुरदेखि मध्यमर्स्याङ्दीसम्मको ६ किलोमिटर प्रसारण लाइन निर्माण पूरा नगर्दा आयोजनाको विद्युत् जोडिन नपाएको जलविद्युत् आयोजनाका निर्देशक गुरुप्रसाद ढकालले बताए । उनका अनुसार लाइनको १.८ किलोमिटर मात्र तार तान्न बाँकी छ । 

नेपाल विद्युत् प्राधिकरणले निर्माण गरिरहेको २२० केभी मर्स्याङ्दी कोरिडोर प्रसारण लाइन तयार नहुँदा आयोजनाको विद्युत् प्रणालीमा जोडिन नपाएकोे हो । वैशाखको पहिलो साताबाट व्यावसायिक विद्युत् उत्पादन गर्ने योजना भए पनि लाइन तयार नहुँदा विद्युत् खेर गइरहेको आयोजनाका निर्देशक ढकालको भनाइ छ ।

०७२ फागुनबाट निर्माण सुरु गरेको यस आयोजनाले ०७५ भदौ १५ गते विद्युत् उत्पादन गर्ने लक्ष्य राखेको थियो । पछि समय थपेर ०७६ चैत मसान्तसम्ममा निर्माण सक्ने सम्झौता गरे पनि सो अवधिमा पनि निर्माण सम्पन्न नभएपछि पटक–पटक गरी ०७७ चैत मसान्तसम्म सक्ने गरी सम्झौता भएको थियो । ०७७ चैत महिनासम्म बिजुली उत्पादन गर्ने लक्ष्य राखे पनि सोअनुसार काम हुन नसकेपछि आयोजनाले फेरि वैशाखदेखि उत्पादन गर्ने योजना भए पनि लाइन समस्याले गर्दा विद्युत् जोडिन पाएन ।

नाकाबन्दी, अघिल्लो वर्षायाममा विद्युतगृहमा मर्स्याङ्दी नदीको पानी छिरेर मेसिनरी सामानमा पुर्‍याएको क्षति, कोरोनाका कारण जारी निषेधाज्ञा र सुरुङ निर्माण गर्ने क्रममा कमजोर चट्टान भेटिएकाले ढिलाइ हुन पुग्दा निर्धारित समयमा काम सम्पन्न नभएको आयोजनाले जनाएको छ । 

आयोजना सम्पन्न गर्न सुरुमा चार अर्ब २३ करोड रुपैयाँ लाग्ने अनुमानका साथ निर्माण थालनी गरे पनि निर्माण अवधि लम्बिँदै गएकाले करिब चार अर्ब ६४ करोड रुपैयाँ खर्च भएको अनुमान छ ।