सत्तागठबन्धनको तर्फबाट भरतपुर महानगरपालिकाकी मेयर पदकी उम्मेदवार रेनु दाहालले विगतको कार्यकालमा आफूले टाउको झुकाउनु नपर्ने गरी काम गरेको दाबी गरेकी छन् ।  भरतपुरमा बिहीबार आयोजित गठबन्धनको संयुक्त चुनावी सभालाई सम्बोधन गर्दै उनले जनताका र प्रतिपक्षका अगाडि आँखामा आँखा जुधाएर भन्न सक्ने गरी काम गरेको बताएकी हुन्।

‘यो पाँच वर्षमा मैले साझा जनप्रतिनिधिको रूपमा काम गर्ने कोसिस गरेँ। पाँच वर्षमा हामी टाउको झुकाउनु नपर्ने गरी सीधा आँखाले जनता र प्रतिपक्षका अगाडि पनि आँखामा आँखा जुधाएर हामी भन्न सक्छौँ हामीले गर्व गर्नलायक ठाउँमा (भरतपुरलाई) पुर्‍याएका छौँ,’ उनले भनिन्।

त्यस्तै, उनले विगतमा समग्र भरतपुरका जनताको विकासमा आफूले ट्रेलर देखाइसकेको र निर्वाचित भएर आएपछि समग्र चलचित्र देखाउने बताइन्। ‘हामीले पाँच वर्षमा कास्टिङ देखाइसकेका छौँ, फेरि निर्वाचित भएर आयौँ भने हामी समग्र फिल्म  देखाउँछौँ,’ उनले भनिन्।