- वि.सं २o७९ बैशाख १५ बिहीबार
प्रधानमन्त्री एवं नेपाली कांग्रेसका सभापति शेरबहादुर देउवाले बागी उम्मेदवारी फिर्ता लिन नेता–कार्यकर्तालाई आग्रह गरेका छन्। बिहीबार एक अपिल जारी गर्दै सभापति देउवाले गठबन्धनको सहमतिविपरीत दिएका उम्मेदवारी फिर्ता लिन र गठबन्धनका उम्मेदवारलाई विजयी गराउन अपिल गरेका हुन्।
अपिलमा भनिएको छ, ‘पार्टीको विजयका लागि साथीको उम्मेदवारी नै मेरो उम्मेदवारी भन्ने उच्चतम भावना राख्न र नेपाली कांग्रेसको एकल उम्मेदवारी भएको तह होस् या सत्तागठबन्धनका दलहरूसँग तालमेल भएको तह, त्यहाँको विजय अभियानलाई त्याग, एकता र समर्पणका साथ सफल बनाउन म अपिल गर्दछु।’
आसन्न स्थानीय तह निर्वाचनमा सत्तागठबन्धनमा भएको सहमतिविपरीत विभिन्न स्थानमा पार्टीका तर्फबाट बागी उम्मेदवारी परेपछि सभापति देउवाले बागी उम्मेदवारी फिर्ता लिन अपिल गरेका हुन्।
