- वि.सं २o७९ बैशाख ११ आइतबार
वैशाख ३० गते हुने स्थानीय तहको निर्वाचनका लागि एमालेले मनाङमा गाउँपालिका अध्यक्ष र उपाध्यक्षका उम्मेदवार टुंग्याएको छ । चारवटा गाउँपालिका र २८ वटा वडा रहेको मनाङमा एमालेले अध्यक्ष र उपाध्यक्ष उम्मेदवार चयन गरेको हो ।
मनाङ सदरमुकाम चामे गाउँपालिकामा अहिलेका अध्यक्ष लोकेन्द्र घले नै दोहोरिने भएका छन् । चामे गाउँपालिकामा उपाध्यक्षमा आसकुमारी गुरुङ उपाध्यक्षकाे उम्मेदवार चयन गरिएको छ ।
यस्तै, मनाङको मनाङ ङिस्याङ गाउँपालिकाको अध्यक्षमा पनि पुनः कान्छा घलेलाई दोहोर्याइएको छ । उपाध्यक्षमा छिरिङ धावा गुरुङले टिकट पाएका छन् । नासों गाउँपालिकाको अध्यक्षमा मनबहादुर गुरुङ र उपाध्यक्षमा अर्विन गुरुङ (स्वतन्त्र) चयन भएका छन् ।
मनाङको नार्पाभूमि गाउँपालिकाको अध्यक्ष र उपाध्यक्षमा भने एमालेले स्वतन्त्र उम्मेदवार उठाउने भएको छ । एमालेले ०७४ सालमा भएको स्थानीय तहको निर्वाचनमा मनाङको चामे र मनाङ ङिस्याङ गाउँपालिकामा चुनाव जितेको थियो ।
