मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० चैत १६ शुक्रबार
  • Friday, 29 March, 2024
नयाँ पत्रिका काठमाडौं
२०७८ माघ १४ शुक्रबार ०९:३८:००
Read Time : < 1 मिनेट
अर्थ प्रिन्ट संस्करण

कोभिडको समय चार्टर उडानमा बढी भाडा तिरेका यात्रुलाई उजुरी गर्न पर्यटन मन्त्रालयको आग्रह 

Read Time : < 1 मिनेट
नयाँ पत्रिका, काठमाडौं
२०७८ माघ १४ शुक्रबार ०९:३८:००

कोभिड–१९ महामारीको समयमा गरिएका अन्तर्राष्ट्रिय चार्टर उडानमा तोकिएको भन्दा बढी भाडा तिर्न बाध्य यात्रुहरूलाई एक हप्ताभित्र निवेदन दिन पर्यटन मन्त्रालयले आग्रह गरेको छ । पीडित यात्रुहरूले बढी भाडा तिरेको आधिकारिक कागजातसहित मन्त्रालयको आधिकारिक इमेल, ह्वाट्स एप वा भाइबरमार्फत गुनासो–निवेदन पठाउन सक्ने मन्त्रालयले जनाएको छ । 

कोभिड महामारीको पहिलो चरणमा लकडाउन घोषणा भएपश्चात् विभिन्न मुलुकमा अलपत्र परेका व्यक्तिलाई स्वदेश फर्काउन अन्तर्राष्ट्रिय चार्टर उडानको व्यवस्था गरिएको थियो । तर, चार्टर उडानमा एयरलाइन्स कम्पनीले नेपाल नागरिक उड्डयन प्राधिकरण (क्यान)मा बुझाएको हवाई भाडादरभन्दा यात्रुसँग बढी हवाई भाडा असुल गरेको गुनासो तथा उजुरी परेको थियो । यात्रुको गुनासोका आधारमा मन्त्रालयले छानबिन गर्न हवाई भाडादर छानबिन समिति, २०७८ गठन गरेको थियो । 

सो समितिले पनि चार्टर उडानमा विभिन्न एयरलाइन्सको टिकटमा यात्रुसँग तोकिएको भन्दा बढी भाडादर लिएको फेला परेको थियो । अहिले पनि चार्टर उडानमा ठगिएको गुनासो आइरहेको सन्दर्भमा हवाई भाडादर प्रकरण थप छानबिन गर्न मन्त्रालयले यात्रुसँग विवरण माग गरेको हो । साथै, चार्टर उडानको हवाई भाडादर प्रकरणलाई थप छानबिन गरेर यात्रुहरूको गुनासो सम्बोधन गर्न मन्त्रालयले पुनः छानबिन समिति गठन गरेको छ ।