भारतको ७३औँ गणतन्त्र दिवसका अवसरमा काठमाडौंस्थित भारतीय राजदूतावासले बुधबार कार्यक्रम आयोजना गरेको छ । नेपालका लागि भारतीय राजदूत विनयमोहन क्वात्राले दूतावास परिसर लैनचौरमा भारतको राष्ट्रिय झन्डा झन्डाेत्तोलन गरेका छन् । राजदूत क्वात्राले वीर नारी र मृतक सैनिकका निकटतम नातेदारलाई ६ करोड ३५ लाख नगद तथा कम्बल वितरणसहित सम्मान गरेका छन् ।
दूतावासद्वारा जारी विज्ञप्तिमा भनिएको छ, ‘मानवीय प्रयासका सबै क्षेत्रहरूमा भारतीयले हासिल गरेका उल्लेखनीय उपलब्धिको र भारतको स्वतन्त्रताको ७५ वर्षको उत्सव मनाउन भारत सरकारले अघि सारेकोे ‘आजादीका अमृत महोत्सव’ पहलकदमीकै एक हिस्साको रूपमा यो कार्यक्रमको आयोजना गरिएको हो ।’ आजादीका अमृत महोत्सवअन्तर्गत वर्षैभरि र सन् २०२३ को अगस्ट महिनासम्म विभिन्न कार्यक्रमको आयोजना गरिने दूतावासले जनाएको छ ।
नेपालका प्रदेश तथा जिल्लामा भारतको सहयोगमा कार्यान्वयन भएका ७५ वटा विकास परियोजना यसै वर्ष उद्घाटन गर्ने योजना रहेको भारतीय दूतावासका प्रवक्ता नवीन कुमारले जानकारी दिए । यही वर्ष नेपालभरिका विभिन्न संस्था तथा स्थानीय निकायलाई दूतावासले ७५ वटा एम्बुलेन्स र स्कुल बस उपहारस्वरूप प्रदान गर्ने कार्यक्रम रहेको पनि उनले जानकारी दिए ।