मुख्य समाचार डिजिटल संस्करण

माओवादी महाधिवेशन : लेखनाथ न्यौपानेले राखेको फरक मत प्रतिवेदनमा समेटिएन

नेकपा(माओवादी केन्द्र)को आठौँ राष्ट्रिय महाधिवेशनको बन्दसत्रले अध्यक्ष पुष्पकमल दाहाल ‘प्रचण्ड’ले प्रस्तुत गरेको राजनीतिक प्रतिवेदनमाथि आएका सुझाबमा केन्द्रीय सदस्य लेखनाथ न्यौपानेको फरक मत समावेश नभएको बताइएको छ ।

माओवादी केन्द्रका प्रवक्ता कृष्णबहादुर महराले राजनीतिक प्रतिवेदनमा आएका सकारात्मक सुझाबहरूलाई अध्यक्ष प्रचण्डले स्वीकार गरेको बताए । केन्द्रीय कमिटी सदस्य लेखनाथ न्यौपानेले राखेको फरक मत भने प्रतिवेदनमा समावेश गर्न नसकिने भएकाले त्यसबारेमा बहस गर्दै जाने प्रवक्ता महराले बताए । बन्दसत्रले अध्यक्ष प्रचण्डले प्रस्तुत गरेको राजनीतिक प्रतिवेदन पारित गरेको छ ।

शुक्रबारको बन्दसत्रमा निर्वाचन आयोग, अनुशासन आयोग र लेखा परीक्षण आयोगले आ–आफ्नो प्रतिवेदन पनि पेस गरेका थिए । शनिबार बिहान ११ बजे पुनः महाधिवेशनको बाँकी कार्यक्रम सुरु हुने माओवादी केन्द्रले जनाएको छ ।