- वि.सं २o७८ मङ्सिर १८ शनिबार
नेपाल इन्भेष्टमेन्ट बैंक लिमिटेडको वार्षिक साधारणसभाले गत आर्थिक वर्षको लाभांश पारित गरेको छ । सभाले १२.६११ प्रतिशत बोनस सेयर र ३.३८९ प्रतिशत नगद लाभांश गरी कुल १६ प्रतिशत लाभांश पारित गरेको हो । बैंकका अध्यक्ष पृथ्वीबहादुर पाँडेको अध्यक्षतामा शुक्रबार ३५औँ वार्षिक साधारणसभा सम्पन्न भएको हो ।
कोभिड महामारीलाई मध्यनजर गरी साधारणसभा भर्चुअल रूपमा सम्पन्न गरिएको छ । सभामा गत आवमा भएका बैंकका प्रमुख उपलब्धिहरू, भविष्यका योजनाहरू, कार्यसम्पादन लक्ष्य र रणनीतिका बारेमा छलफल भएको थियो ।
गत वर्ष बैंकले पाँच अर्ब ११ करोड रुपैयाँ सञ्चालन नाफा गरेको थियो भने तीन अर्ब ५५ करोड रुपैयाँ खुद नाफा आर्जन गरेको थियो । बैंकको कुल चुक्ता पुँजी १८ अर्ब ३० करोड रुपैयाँ पुगेको छ । बैंकका ८८ शाखा, एक सय ३१ एटिएम, २० एक्सटेन्सन काउन्टर, १० राजस्व संकलन काउन्टर र ५८ शाखारहित बैंकिङ काउन्टर पुगेका छन् ।
