फ्रन्ट पेज प्रिन्ट संस्करण

कक्षा १२ को परीक्षा  फारम खुल्दासम्म कक्षा  ११ को ग्रेडसिट टुंगो लागेन

शिक्षा मन्त्रालयले बुझेन करिब चार लाख विद्यार्थीको पीडा

परीक्षा फारम भर्ना खुल्दासम्म कक्षा १२ का विद्यार्थीले कक्षा ११ को ग्रेडसिट पाएका छैनन् । पाठ्यक्रम विकास केन्द्रले अहिलेसम्म कक्षा १२ मा अध्ययन गरिरहेका विद्यार्थीको ग्रेडसिट ढाँचाको अन्तिम रूप दिन सकेको छैन । जब कि कक्षा ११ को ग्रेडसिट लिएर कक्षा १२ मा भर्ना हुनुपर्ने व्यवस्था छ ।

अघिल्लो शैक्षिक सत्रदेखि कक्षा ११ मा नयाँ पाठ्यक्रम कार्यान्वयनमा आएको छ । नयाँ पाठ्यक्रमअनुसार ११ कक्षा अध्ययन गरेका विद्यार्थीको विद्यालयले नै आन्तरिक परीक्षा लिएर कक्षा १२ मा अध्ययनरत छन् । नयाँ पाठ्यक्रमअनुसार कक्षा १२ मा अध्ययनरत विद्यार्थीका लागि राष्ट्रिय परीक्षा बोर्डले परीक्षा आवेदन फारम खुलाइसकेको छ ।

राष्ट्रिय परीक्षा बोर्डले कक्षा ११ को ग्रेडसिटविना १२ को परीक्षा फारम बुझ्दैन । शिक्षामन्त्री अध्यक्ष हुने पाठ्यक्रम विकास तथा मूल्यांकन परिषद्ले ढाँचा नै टुंगो लगाएको छैन । जसका कारण करिब चार लाख विद्यार्थी प्रत्यक्ष प्रभावित भएका छन् ।

कक्षा १२ सम्मको शिक्षा विद्यालय तह बनाएपछि कक्षा ११ को नतिजा सार्वजनिक नगरी कक्षा १२ मा भर्ना गर्न मिल्दैन । तर, अहिले कक्षा ११ मा कुनै विषयमा डी प्लस पनि ल्याउन नसकेका विद्यार्थीसमेत कक्षा १२ मा अध्ययन गरिरहेका छन् । नतिजा तयार हुँदा पनि विद्यालयले ग्रेडसिट दिन सकेका छैनन् ।

हिसानका महासचिव तथा जेभियर इन्टरनेसनल कलेजका सिइओ लोकबहादुर भण्डारीले विद्यार्थीले आन्तरिक रूपमा नतिजा थाहा पाए पनि ग्रेडसिट दिन नसकेको बताए । कुन ढाँचामा ग्रेडसिट उपलब्ध गराउने भन्ने अन्योल भएको भण्डारीले बताए ।

पाठ्यक्रम विकास केन्द्रका महानिर्देशक अणप्रसाद न्यौपानेले ग्रेडसिटको ढाँचा छिटै तयार हुने बताए । ‘ग्रेडसिटको ढाँचा तयार भएको छ । राष्ट्रिय परीक्षा बोर्डसँग बसेर छलफल गरी अब छिटै सार्वजनिक गर्छौँ । ग्रेडसिट नहुँदाको समस्याबारेमा जानकारी आएको छ । लेटर ग्रेडिङ कार्यविधि संशोधनसहित ग्रेडसिट ढाँचा टुंगो लगाउने तयारी भइरहेको छ,’ उनले भने । 

मदन भण्डारी मेमोरियल कलेजका कक्षा ११, १२ का को–अर्डिनेटर कमल न्यौपानेले ग्रेडसिटको टुंगो नलगाउँदा विद्यार्थीको नतिजा सार्वजनिक गर्न नसकेको बताए । कोअर्डिनेटर न्यौपानेले भने, ‘विद्यार्थीलाई सैद्धान्तिकमा ७५ र आन्तरिक मूल्यांकन २५ अंक तोकेको छ, तर यो गाभेर एउटै ग्रेडमा रिजल्ट दिने वा ग्रेडसिटमा छुट्टाछुट्टै दिने भन्ने अन्योल छ ।’

क्रेडिट आवरमा समेत अन्योल
कक्षा ११ मा सैद्धान्तिक र आन्तरिक मूल्यांकन वा प्रयोगात्मकको क्रेडिट आवरसमेत टुंगो लागेको छैन । कतिपय विषयमा राष्ट्रिय परीक्षा बोर्ड र पाठ्यक्रम विकास केन्द्रबीचमा समन्वय नहुँदा अन्योल बढेको छ ।

स्रोतका अनुसार बोर्डले प्रयोगात्मकको क्रेडिट आवरका विषयमा निर्णय गरेर गत भदौमै शिक्षा मन्त्रालय पठाएको थियो । प्रयोगात्मक बढी भएका कम्तीमा पाँच विषयमा क्रेडिट आवर प्रस्ताव गरी पठाएको छ । फिजिक्स, केमेस्ट्री, बायोलोजी, होटेल म्यानेजमेन्ट र कम्प्युटर म्यानेजमेन्ट गरी पाँच विषयको सैद्धान्तिक र प्रयोगात्मकको क्रेडिट आवर टुंगाउन बोर्डले शिक्षा मन्त्रालयमा पेस गरेको थियो । सकेसम्म अन्य विषयमा पनि सैद्धान्तिक र प्रयोगात्मकको क्रेडिट आवर टुंग्याउन बोर्डमा प्रस्ताव गरेको छ । तर, सो प्रस्ताव पाठ्यक्रम विकास तथा मूल्यांकन परिषद्बाट निर्णय भएको छैन ।

कक्षा १२ को नतिजा आज सार्वजनिक गर्ने तयारी

राष्ट्रिय परीक्षा बोर्डले कक्षा १२ को परीक्षाको नतिजा शुक्रबार सार्वजनिक गर्ने तयारी गरेको छ । गत ३० भदौदेखि ८ असोजसम्म सञ्चालन भएको परीक्षाको नतिजा शुक्रबार सार्वजनिक गर्ने तयारी गरेको हो ।

बोर्ड स्रोतका अनुसार बिहीबार बसेको बैठकमा नतिजाको डेमो तथा एक्पेल भए/नभएको हेरिएको थियो । बिहीबारको बोर्ड बैठकमा त्रुटि नदेखिएपछि शुक्रबार नतिजा सार्वजनिक गर्ने तयारी भएको छ । शुक्रबार बिहान ९ बजे बोर्ड बैठक बोलाइएको छ ।

कक्षा १२ को परीक्षा होम सेन्टरमा सञ्चालन भएको थियो । परीक्षा सकिएको ६७ दिनमा नतिजा सार्वजनिक गर्न लागेको छ । देशभरबाट तीन लाख ७४ हजार विद्यार्थी परीक्षामा सहभागी भएका थिए ।