- वि.सं २o७८ मङ्सिर ९ बिहीबार
जिल्ला प्रहरी कार्यालय लमजुङले चोरी मुद्दाका फरार दुईजनालाई पक्राउ गरेको छ । प्रहरीले डाँकाचोरी मुद्दामा फरार रहेका मस्र्याङ्दी गाउँपालिका– ६ का वर्ष ४५ का प्रकाश कतिला र मस्र्याङ्दी– ९ का वर्ष ३१ का धुर्मुस भन्ने अम्मरबहादुर घिमिरेलाई पक्राउ गरेको हो ।
उनीहरूलाई प्रहरीले बुधबार सदरमुकाम बेँसीसहरबाट पक्राउ गरेको लमजुङका प्रहरी प्रमुख डिएसपी कृष्णबहादुर कार्कीले बताए । उनले भने, ‘कतिलालाई ३० दिन कैद र घिमिरेलाई २९ दिन कैद सजाय हुने गरी जिल्ला अदालत लमजुङबाट मुद्दा फैसला भएको थियो ।
उनीहरूविरुद्ध जिल्ला प्रहरी कार्यालय लमजुङमा ०७६ साउन २२ गते डाँकाचोरी मुद्दा दर्ता भएको जिल्ला प्रहरी कार्यालय लमजुङका सूचना अधिकारी एवं प्रहरी निरीक्षक जगदीश रेग्मीले बताए ।
