- वि.सं २o७८ असोज ३० शनिबार
दक्षिण एसियाली फुटबल (साफ) च्याम्पियनसिपको उपाधिका लागि आज नेपाल र भारतबीच प्रतिस्पर्धा हुँदै छ। भारतविरुद्धको खेलमा नेपालको सुरुवाती–११ घोषणा भएको छ । पौने नौ बजे सुरु हुने खेलमा नेपाली टोलीको कप्तानी गोलकिपर किरण चेम्जोङले गर्नेछन् ।
नेपालको डिफेन्समा अनन्त तामाङ, गौतम श्रेष्ठ, दिनेश राजवंशी र सुमन अर्याल छन्। यसैगरी मिडफिल्डमा पुजन उपरकोटी, तेज तामाङ र रोहित चन्द तथा फरवार्डमा सुजल श्रेष्ठ, नवयुग श्रेष्ठ र सुमन लामा छन्।
गत बुधबार बंगलादेशसँग १–१ को बराबरी खेल्दै नेपाल पहिलोपटक साफ च्याम्पियनसिपको फाइनल प्रवेश गरेको हो । आजको खेलमा नेपालका फरवार्ड अञ्जन विष्टले भने खेल्न पाउनेछैनन् । अघिल्ला खेलहरुमा दुईवटा पहेंलो कार्ड पाएकाले उनी फाइनल खेलबाट वञ्चित भएका हुन् ।
यसैगरी, नेपालका मुख्य प्रशिक्षक अब्दुल्लाह अल्मुताइरी डगआउट (टेक्निकल एरिया)मा हुने छैनन् । उनले पनि दुईवटा पहेँलो कार्ड पाएको भन्दै साफले डगआउट बस्न प्रतिबन्ध गराएको हो ।
