- वि.सं २o७८ श्रावण ९ शनिबार
सुदूरपश्चिमका ७ पहाडी जिल्ला जोड्ने भीमदत्त राजमार्ग पहिरोका कारण ११ घन्टादेखि अवरुद्ध भएको छ । डडेल्धुरास्थित आलिताल गाउँपालिका १ कटाल, गैरास्थित सडकखण्डमा पहिरो गएपछि राजमार्ग अवरुद्ध भएको प्रहरीले जनाएको छ ।
पहिरो नरोकिएकाले राजमार्ग खुलाउन समस्या भएको प्रहरीले बताएको छ । यद्यपि, पहिरो पन्छाउने काम भइरहेको जिल्ला प्रहरी कार्यालय डडेल्धुराका प्रहरी नायब उपरीक्षक महेन्द्र नेपालले जानकारी दिए ।
राजमार्ग अवरुद्ध हुँदा यात्रु अलपत्र परेका हुन् । सुदूरपश्चिमका सात पहाडी जिल्लाको प्रमुख राजमार्ग भीमदत्त जोखिम पूर्ण बन्दै गएको सरोकारवालाहरूले बताएका छन् । रार्जमार्गको मोड सुधार योजनाका कारण पटक–पटक पहिरो जाने गरेको छ ।
